taj-mahal

merī mahbūb zarā aaj mire saath to chal

aaj ham manzil-e-ulfat kā nishāñ pā leñge

duur duniyā kī nigāhoñ se kahīñ par chhup kar

maiñ ne sochā hai ki ik tāj-mahal Dhā leñge

baad nau maah ke shahkār barāmad hogā

us ajūbe kī magar shāhjahāñ tū hogī

us meñ aa.egā nazar terī hasīñ shakl kā aks

mere aḳhlāq-o-sharāfat kī bhī kuchh bū hogī

kyā ḳhabar tujh ko javāñ ho ke tirā tāj-mahal

raunaq-e-mahfil-e-hastī ko do-bālā kar de

aaj sunsān añdheroñ meñ jise Dhāleñ ham

kal vahī saare zamāne meñ ujālā kar de

merī mahbūb ye duniyā kī imārāt-e-qadīm

dāman-e-arz pe chhīñToñ ke sivā kuchh bhī nahīñ

rauza-e-tāj ko is tarah ta.ajjub se na dekh

ye tarāshī huī īñToñ ke sivā kuchh bhī nahīñ

merī mahbūb zarā der kī taklīf sahī

zabt kar zabt ki ik tāj-mahal bantā hai

apnī hastī ko miTā detī hai ma.asūm kalī

tab kahīñ jā ke kisī shāḳh pe phal bantā hai

meri mahbub zara aaj mere sath to chal

aaj hum manzil-e-ulfat ka nishan pa lenge

dur duniya ki nigahon se kahin par chhup kar

main ne socha hai ki ek taj-mahal Dha lenge

baad nau mah ke shahkar baramad hoga

us ajube ki magar shahjahan tu hogi

us mein aaega nazar teri hasin shakl ka aks

mere aKHlaq-o-sharafat ki bhi kuchh bu hogi

kya KHabar tujh ko jawan ho ke tera taj-mahal

raunaq-e-mahfil-e-hasti ko do-baala kar de

aaj sunsan andheron mein jise Dhaalen hum

kal wahi sare zamane mein ujala kar de

meri mahbub ye duniya ki imaraat-e-qadim

daman-e-arz pe chhinTon ke siwa kuchh bhi nahin

rauza-e-taj ko is tarah tajjub se na dekh

ye tarashi hui inTon ke siwa kuchh bhi nahin

meri mahbub zara der ki taklif sahi

zabt kar zabt ki ek taj-mahal banta hai

apni hasti ko miTa deti hai masum kali

tab kahin ja ke kisi shaKH pe phal banta hai