taj-mahal

shah-jahāñ kā taaj hai duniyā ke sab mahloñ kā shaah

pyaar kā ye giit hai qalb-e-hazīñ kī bhī hai aah

ik shahanshah kī mohabbat ho ga.ī hai lā-zavāl

paikar-e-marmar meñ pinhāñ hai numāyāñ hai kamāl

chaudhvīñ kī chāñdnī meñ taaj kā vo husn-o-rang

chāñd hai apne harīf-e-husn ke jalve se dang

zindagī meñ chāñd se baḌh kar hasīñ mumtāz thī

shah-jahāñ kī ham-nashīñ thī hamdam-o-hamrāz thī

husn us kā aaj bhī hai goshe goshe se ayaañ

taaj ke har ek pahlū meñ hai ulfat kā nishāñ

taaj husn-o-ishq kā hai aisā ik rangīn ḳhvāb

pesh karnā ġhair mumkin hai 'asad' jis kā javāb

shah-jahan ka taj hai duniya ke sab mahlon ka shah

pyar ka ye git hai qalb-e-hazin ki bhi hai aah

ek shahanshah ki mohabbat ho gai hai la-zawal

paikar-e-marmar mein pinhan hai numayan hai kamal

chaudhwin ki chandni mein taj ka wo husn-o-rang

chand hai apne harif-e-husn ke jalwe se dang

zindagi mein chand se baDh kar hasin mumtaz thi

shah-jahan ki ham-nashin thi hamdam-o-hamraaz thi

husn us ka aaj bhi hai goshe goshe se ayan

taj ke har ek pahlu mein hai ulfat ka nishan

taj husn-o-ishq ka hai aisa ek rangin KHwab

pesh karna ghair mumkin hai 'asad' jis ka jawab