talib-ilm

tumheñ ma.alūm hai taimūr kī faujeñ jis vaqt

apne dushman pe baḌhā kartī thiiñ

aurteñ pīchhe rahā kartī thiiñ

aur jo aalim the fāzil the un insānoñ kā jarga sab ke

pīchhe pīchhe hī chalā kartā thā

kis liye sab ko rah-e-zīst pe har gaam baḌhāne vaale

sab se pīchhe hī chalā karte haiñ

ilm meñ ek hī buniyādī kamī hai varna

ilm har ek zamāne meñ har ek shai se taraqqī paatā

aaj iqbāl ye kahtā hai ki aurat hī kā sho.ala vo jis se yūnān

hashr tak ilm-e-falātūn se rahegā zinda

aaj schōl meñ college meñ maqām-e-avval

auratoñ ke liye maḳhsūs kiye jaate haiñ

aaj añgrezī paḌhī jaatī hai juġhrāfiya tārīḳh har ik ilm yahāñ

aise ustād sikhātā hai ki jaise ham ko

yahī ma.alūm nahīñ hai ki jo aalim the jo fāzil the un insānoñ kā jarga sab se

pīchhe pīchhe hī baḌhā kartā thā

aurteñ un se zarā aage rahā kartī thiiñ

aurteñ aaj bhī aage hī rahā kartī haiñ

aurteñ aaj bhī kahtī haiñ hamāre gesū

chāhe bikhre hoñ ki ek juuḌe meñ pāband kiye baiThe hoñ

dekhne vāloñ kī nākām tamannāoñ ko

ek hī haath ke pāband huā karte haiñ

vahī ik haath jo talvār ko pahlū meñ liye

sab se aage hī chalā kartā hai

us ko kuchh ilm kī parvāh nahīñ (aurat kī bhī parvāh kyā hai)

us ko kuchh ilm nahīñ kaise falātūñ pal meñ

ik sharar ban ke bujhā kartā hai

sāmne to hai magar terā munavvar chehra

usī jāhil ko nazar aatā hai

jo ye kahtā hai ki taimūr kī faujeñ jis vaqt

apne dushman pe baḌhā kartī thiiñ

aurteñ pīchhe rahā kartī thiiñ

aur jo aalim the jo fāzil the vo ye sochte the

haar kis shaḳhs kī hai jiit hai kis kī chhoḌo

ham bhī kin chhoTī sī bātoñ meñ ulajh baiThe haiñ

chalte chalte mujhe tezī se ḳhayāl aayā hai

terā ye juuḌā jo khul jaa.e bikhar jaa.e to phir kyā hogā

merī tārīḳh ki terī tārīḳh

phail kar aaj pe (aur kal pe bhii) chhā jā.egī

sochne vaale ko ik pal meñ batā jā.egī

aurteñ pīchhe agar hoñ bhī to aage hī rahā kartī haiñ

aur falātūñ kā chachā haath meñ talvār liye aage baḌhā kartā hai

lo vo juuḌā bhī falātūñ hī se kuchh kahne lagā

aur raste meñ use kaun milegā taimūr

aur vo us se kahegā ki yahāñ kyuuñ aa.ī

jā mire pīchhe chalī jā ki tire pīchhe hamesha har-dam

ilm yuuñ reñgte hī reñgte baḌhtā jaa.e

jaise har baat ke pīchhe har baat

reñgte reñgte baḌhtī hī chalī jaatī hai

aur har ek falātūñ jo sharar ban ke chamaktā hai vo miT jaatā hai

tumhein malum hai taimur ki faujen jis waqt

apne dushman pe baDha karti thin

aurten pichhe raha karti thin

aur jo aalim the fazil the un insanon ka jarga sab ke

pichhe pichhe hi chala karta tha

kis liye sab ko rah-e-zist pe har gam baDhane wale

sab se pichhe hi chala karte hain

ilm mein ek hi buniyaadi kami hai warna

ilm har ek zamane mein har ek shai se taraqqi pata

aaj iqbaal ye kahta hai ki aurat hi ka shoala wo jis se yunan

hashr tak ilm-e-falatun se rahega zinda

aaj school mein college mein maqam-e-awwal

auraton ke liye maKHsus kiye jate hain

aaj angrezi paDhi jati hai jughrafiya tariKH har ek ilm yahan

aise ustad sikhata hai ki jaise hum ko

yahi malum nahin hai ki jo aalim the jo fazil the un insanon ka jarga sab se

pichhe pichhe hi baDha karta tha

aurten un se zara aage raha karti thin

aurten aaj bhi aage hi raha karti hain

aurten aaj bhi kahti hain hamare gesu

chahe bikhre hon ki ek juDe mein paband kiye baiThe hon

dekhne walon ki nakaam tamannaon ko

ek hi hath ke paband hua karte hain

wahi ek hath jo talwar ko pahlu mein liye

sab se aage hi chala karta hai

us ko kuchh ilm ki parwah nahin (aurat ki bhi parwah kya hai)

us ko kuchh ilm nahin kaise falatun pal mein

ek sharar ban ke bujha karta hai

samne to hai magar tera munawwar chehra

usi jahil ko nazar aata hai

jo ye kahta hai ki taimur ki faujen jis waqt

apne dushman pe baDha karti thin

aurten pichhe raha karti thin

aur jo aalim the jo fazil the wo ye sochte the

haar kis shaKHs ki hai jit hai kis ki chhoDo

hum bhi kin chhoTi si baaton mein ulajh baiThe hain

chalte chalte mujhe tezi se KHayal aaya hai

tera ye juDa jo khul jae bikhar jae to phir kya hoga

meri tariKH ki teri tariKH

phail kar aaj pe (aur kal pe bhi) chha jaegi

sochne wale ko ek pal mein bata jaegi

aurten pichhe agar hon bhi to aage hi raha karti hain

aur falatun ka chacha hath mein talwar liye aage baDha karta hai

lo wo juDa bhi falatun hi se kuchh kahne laga

aur raste mein use kaun milega taimur

aur wo us se kahega ki yahan kyun aai

ja mere pichhe chali ja ki tere pichhe hamesha har-dam

ilm yun rengte hi rengte baDhta jae

jaise har baat ke pichhe har baat

rengte rengte baDhti hi chali jati hai

aur har ek falatun jo sharar ban ke chamakta hai wo miT jata hai