talim-o-tarbiyat

baap ne beTe ko bulvā kar ye pūchhā kyā huā

imtihāñ kā aaj hī to thā natīja kyā huā

ye kahā beTe ne fauran apnā siina taan kar

aap ḳhush hoñge yaqīnan ye haqīqat jaan kar

kam hī karte haiñ kiyā jo aap kī aulād ne

sāmne sab ke kahā mujh se mire ustād ne

ham tumheñ jaane na deñge is jamā.at se abhī

tum hī raunaq ho yahāñ kī aur tum hī raushnī

aur bārah maah tum ārām se rahnā yahīñ

in ko jaane do agar jaate haiñ baaqī ham-nashīñ

sar-buland aur shādmāñ schōl se aayā huuñ maiñ

ḳharch copy aur kitāboñ kā bachā laayā huuñ maiñ

baap bolā vaah beTe kar diyā tū ne kamāl

ḳhāndāñ meñ is tarah kī hai kahāñ koī misāl

fikr mat kar shaan se aise hī tū schōl jā

ik baras kaafī na ho to pāñch chhe be-shak lagā

ye nasīhat hai magar mat baap kī izzat se khel

paas tū chāhe na ho lekin kabhī honā na fail

bap ne beTe ko bulwa kar ye puchha kya hua

imtihan ka aaj hi to tha natija kya hua

ye kaha beTe ne fauran apna sina tan kar

aap KHush honge yaqinan ye haqiqat jaan kar

kam hi karte hain kiya jo aap ki aulad ne

samne sab ke kaha mujh se mere ustad ne

hum tumhein jaane na denge is jamaat se abhi

tum hi raunaq ho yahan ki aur tum hi raushni

aur barah mah tum aaram se rahna yahin

in ko jaane do agar jate hain baqi ham-nashin

sar-buland aur shadman school se aaya hun main

KHarch copy aur kitabon ka bacha laya hun main

bap bola wah beTe kar diya tu ne kamal

KHandan mein is tarah ki hai kahan koi misal

fikr mat kar shan se aise hi tu school ja

ek baras kafi na ho to panch chhe be-shak laga

ye nasihat hai magar mat bap ki izzat se khel

pas tu chahe na ho lekin kabhi hona na fail