تعمیر گلستاں

مقصد کو نہ پابند تقدیر کرو یارو

تعمیر گلستاں کی تدبیر کرو یارو

کردار میں یوں پیدا تاثیر کرو یارو

ہر خاک کے ذرے کو تسخیر کرو یارو

تم راہ میں ہو اب تک منزل پہ نہیں پہونچے

راہوں کو نہ منزل سے تعبیر کرو یارو

جب رہبر و رہزن میں ہو سکتی ہے سازش بھی

پھر راہ میں کیوں اتنی تاخیر کرو یارو

شاید ابھی کچھ گوشے محتاج تعارف ہیں

قرآن محبت کی تفسیر کرو یارو

ماضی کی ہر اک تلخی تم دل سے بھلا ڈالو

تاریخ نئی اپنی تحریر کرو یارو

انساں کی بلندی ہے آپس کی محبت میں

دل دل سے ملیں ایسی تدبیر کرو یارو

یہ جنت دنیا تو دوزخ ہوئی جاتی ہے

اب اور کوئی جنت تعمیر کرو یارو

جو کچھ رہ الفت میں تکمیلؔ پہ گزری ہے

افسانہ در افسانہ تحریر کرو یارو