tamir-e-nau

aao sab mil ke na.e mulk kī ta.amīr kareñ

sar-buland apne buzurgoñ kī ye jāgīr kareñ

ḳhūn-e-insāf na ho dil meñ kahīñ jhuuT na ho

ektā rishtoñ meñ ho buġhz na ho phuuT na ho

jam.a-ḳhorī na ho mahñgā.ī na ho luuT na ho

sabhī firqoñ ko yuuñ office meñ baġhal-gīr kareñ

āshtī amn kahīñ bhañg na hone paa.e

pyaar kā rang ye bad-rang na hone paa.e

ḳhaar ke hāthoñ kalī tang na hone paa.e

kārgar ahl-e-mohabbat hoñ ye tadbīr kareñ

koī beva na ho sindūr na ujḌe koī

maañ kī mamtā kī bhī tasvīr na bigḌe koī

kisī bahan se javāñ bhaa.ī na bichhḌe koī

jang ko amn ke hathiyār se tasḳhīr kareñ

ruup bigḌe na koī aarzū nākām na ho

aabrū muflis-o-nādār kī nīlām na ho

chand TukḌoñ ke liye zindagī badnām na ho

dard mushtarka hai mushtarka hī tadbīr kareñ

aao sab mil ke nae mulk ki tamir karen

sar-buland apne buzurgon ki ye jagir karen

KHun-e-insaf na ho dil mein kahin jhuT na ho

ekta rishton mein ho bughz na ho phuT na ho

jama-KHori na ho mahngai na ho luT na ho

sabhi firqon ko yun office mein baghal-gir karen

aashti amn kahin bhang na hone pae

pyar ka rang ye bad-rang na hone pae

KHar ke hathon kali tang na hone pae

kargar ahl-e-mohabbat hon ye tadbir karen

koi bewa na ho sindur na ujDe koi

man ki mamta ki bhi taswir na bigDe koi

kisi bahan se jawan bhai na bichhDe koi

jang ko amn ke hathiyar se tasKHir karen

rup bigDe na koi aarzu nakaam na ho

aabru muflis-o-nadar ki nilam na ho

chand TukDon ke liye zindagi badnam na ho

dard mushtarka hai mushtarka hi tadbir karen