tamir

apne siine meñ dabā.e hue lākhoñ sho.ale

shabnam o barf ke naġhmāt sunā.e maiñ ne

ziist ke nauha-e-paiham se churā kar āñkheñ

giit jo gā na sake koī vo gaa.e maiñ ne

aaj tashbīh-o-kināyāt kā dil TuuT gayā

aaj maiñ jo bhī kahūñgā vo haqīqat hogī

aañch lahrā.egī har buuñd se paimāne kī

mere saa.e ko mirī shakl se vahshat hogī

ġham-e-daurāñ ne ġham-e-dil kā sukūñ chhīn liyā

ab tire pyaar meñ bhī pyaar ke andāz nahīñ

shauq ke qil.a-e-tārīk meñ hai sannāTā

koī āvāz nahīñ koī bhī āvāz nahīñ

kaise samjhā.ūñ ki ulfat hī nahīñ hāsil-e-umr

hāsil-e-umr is ulfat kā mudāvā bhī to hai

zindagī hasrat-e-ḳhas-ḳhāna-o-barfāb sahī

kuchh dahakte hue sho.aloñ kī tamannā bhī to hai

tū mirā ḳhvāb hai ādarsh hai lekin mujh ko

tere is qasr-e-tarab-nāk se jaanā hogā

aag aur ḳhuun ugalte hue sayyāre ko

phir tirā qasr-e-tarab-nāk banānā hogā

apne sine mein dabae hue lakhon shoale

shabnam o barf ke naghmat sunae main ne

zist ke nauha-e-paiham se chura kar aankhen

git jo ga na sake koi wo gae main ne

aaj tashbih-o-kinayat ka dil TuT gaya

aaj main jo bhi kahunga wo haqiqat hogi

aanch lahraegi har bund se paimane ki

mere sae ko meri shakl se wahshat hogi

gham-e-dauran ne gham-e-dil ka sukun chhin liya

ab tere pyar mein bhi pyar ke andaz nahin

shauq ke qila-e-tarik mein hai sannaTa

koi aawaz nahin koi bhi aawaz nahin

kaise samjhaun ki ulfat hi nahin hasil-e-umr

hasil-e-umr is ulfat ka mudawa bhi to hai

zindagi hasrat-e-KHas-KHana-o-barfab sahi

kuchh dahakte hue shoalon ki tamanna bhi to hai

tu mera KHwab hai aadarsh hai lekin mujh ko

tere is qasr-e-tarab-nak se jaana hoga

aag aur KHun ugalte hue sayyare ko

phir tera qasr-e-tarab-nak banana hoga