tamiri taKHrib

sub.h ke rangīñ laboñ par hai tabassum kī jhalak

gul matā.a-e-zar nichhāvar karte haiñ kaliyāñ mahak

letī hai añgḌā.iyāñ ġhunchoñ ke pahlū meñ hayāt

karvaToñ par karvaTeñ letī hai rūh-e-kā.enāt

narm-o-nāzuk tābishoñ se zau-fagan hai āftāb

āsmāñ kā matl.a-e-rangīñ hai mahrūm-e-sahāb

be-takalluf haiñ nazar ke sāmne dīvār-o-dar

panja-e-ḳhurshīd se TukḌe hai dāmān-e-sahar

apnī majbūrī pe ahl-e-bāġh ne sar dhun liye

mahr ne kirnoñ kī nakchoTī se motī chun liye

ye samāñ hai maiñ huuñ aur lahore kā lawrence baaġh

gasht meñ haiñ maġhribī tahzīb ke chashm-o-charāg

paikar-e-sharm-o-hayā sharm-o-hayā se duur hai

sīna-e-aḳhlāq meñ ristā huā nāsūr hai

hai zamīñ par is tarah qāmat ke saaye kā nishāñ

āsmāñ par jis tarah ho pāra-e-abr-e-ravāñ

saaye meñ yuuñ dast-o-pā ke muztarib thī raushnī

ā.ina-bāzī meñ ho masrūf jaise tīrgī

jamparoñ kī aisī hai kuchh niim uryāñ sī tarāsh

nāḳhun-e-taḳhrīb kī hai qalb-e-fitrat par ḳharāsh

chal rahī haiñ shoḳhiyoñ kī rau meñ iThlātī huī

har qadam par be-zarī kī laash Thukrātī huī

sādgī ruḳh par kahāñ zauq-e-nazar kī bhuul hai

ye vo tevar hai ki har andāz meñ maqbūl hai

zāhirī sūrat dilī-jazbāt kī tasvīr hai

bahkī bahkī sī nazar bebāk sī taqrīr hai

ye muraqqā hai agar 'naḳhshab' na.ī tahzīb kā

rang aatā hai nazar ta.amīr meñ taḳhrīb kā

subh ke rangin labon par hai tabassum ki jhalak

gul mataa-e-zar nichhawar karte hain kaliyan mahak

leti hai angDaiyan ghunchon ke pahlu mein hayat

karwaTon par karwaTen leti hai ruh-e-kaenat

narm-o-nazuk tabishon se zau-fagan hai aaftab

aasman ka matla-e-rangin hai mahrum-e-sahab

be-takalluf hain nazar ke samne diwar-o-dar

panja-e-KHurshid se TukDe hai daman-e-sahar

apni majburi pe ahl-e-bagh ne sar dhun liye

mahr ne kirnon ki nakchoTi se moti chun liye

ye saman hai main hun aur lahore ka lawrence bagh

gasht mein hain maghribi tahzib ke chashm-o-charag

paikar-e-sharm-o-haya sharm-o-haya se dur hai

sina-e-aKHlaq mein rista hua nasur hai

hai zamin par is tarah qamat ke saye ka nishan

aasman par jis tarah ho para-e-abr-e-rawan

saye mein yun dast-o-pa ke muztarib thi raushni

aaina-bazi mein ho masruf jaise tirgi

jamparon ki aisi hai kuchh nim uryan si tarash

naKHun-e-taKHrib ki hai qalb-e-fitrat par KHarash

chal rahi hain shoKHiyon ki rau mein iThlati hui

har qadam par be-zari ki lash Thukraati hui

sadgi ruKH par kahan zauq-e-nazar ki bhul hai

ye wo tewar hai ki har andaz mein maqbul hai

zahiri surat dili-jazbaat ki taswir hai

bahki bahki si nazar bebak si taqrir hai

ye muraqqa hai agar 'naKHshab' nai tahzib ka

rang aata hai nazar tamir mein taKHrib ka