tare

ākāsh ke niile manDal par jo tāroñ kī gul-kārī hai

saj us kī kyā man-levā hai dhaj kaisī pyārī pyārī hai

aur kāhkashāñ jo biich meñ hai vo phūloñ kī phulvārī hai

kyā nikhrā nikhrā gulshan hai kyā pyārī pyārī kyārī hai

tasnīm nikal kar kausar se firdaus ke andar saarī hai

yā samjho duudh batāshoñ kī ākās pe gangā jaarī hai

aur taare jab is sāgar par kuchh hañste hañste aate haiñ

muñh nuur se apnā dhote haiñ aur ḳhāliq ke gun gaate haiñ

kyā jagmag jagmag kartī haiñ qindīleñ in mah-pāroñ kī

kyā jot jhalā-jhal hotī hai in sundar ruup sitāroñ kī

mat daane dunke jaan inheñ ye haaT nahīñ banjāroñ kī

ye hiire jham jham karte haiñ mat buujh chitā angāroñ kī

kyā nuurī nuurī mash.al haiñ in pyāre pyāre tāroñ kī

kyā jhilmil jhilmil kartī haiñ fānuseñ shab-bedāroñ kī

kyā ruup anuup muzayyan hai jo mahfil ko dikhlāte haiñ

jhumkā kā rang shabistāñ kā sab ḳhāliq ke gun gaate haiñ

aakash ke nile manDal par jo taron ki gul-kari hai

saj us ki kya man-lewa hai dhaj kaisi pyari pyari hai

aur kahkashan jo bich mein hai wo phulon ki phulwari hai

kya nikhra nikhra gulshan hai kya pyari pyari kyari hai

tasnim nikal kar kausar se firdaus ke andar sari hai

ya samjho dudh batashon ki aakas pe ganga jari hai

aur tare jab is sagar par kuchh hanste hanste aate hain

munh nur se apna dhote hain aur KHaliq ke gun gate hain

kya jagmag jagmag karti hain qindilen in mah-paron ki

kya jot jhala-jhal hoti hai in sundar rup sitaron ki

mat dane dunke jaan inhen ye haT nahin banjaron ki

ye hire jham jham karte hain mat bujh chita angaron ki

kya nuri nuri mashal hain in pyare pyare taron ki

kya jhilmil jhilmil karti hain fanusen shab-bedaron ki

kya rup anup muzayyan hai jo mahfil ko dikhlate hain

jhumka ka rang shabistan ka sab KHaliq ke gun gate hain