tariKH ka nauha

shāhoñ ko ḳhabar nahīñ ho sakī

ki bulldozeroñ se haTā.ī ga.ī mayyatoñ kī Dher meñ

kis kis ke ehrām par lahū ne āyateñ raqam kiiñ

hājiyoñ kī jam.a pūñjī se munāfe.a baTortī hukūmateñ

āb-e-zam-zam ke chashme aur petrol ke kueñ meñ

tamīz karnā bhuul jaa.eñ

to ḳhuun kī lakīr haram se nikal kar minā tak pahuñch jaatī hai

shāhī farmān ko ibādat kā darja dene vaale

muftiyoñ ne ye kabhī nahīñ dekhā

ki tārīḳh ka.ī baar taḳht ko taḳhta bante hue dekh chukī hai

shaitān ko patthar mārtā huā hujūm

apne aap ko rauñd kar ḳhaak meñ mil jaatā hai

aur mansūr anal-haq kah kar har daur meñ amar hotā rahā

ḳhudā

nadāmat ke aañsū rone vāloñ ko

muaaf karne meñ der nahīñ kartā

aur shaitān intiqām lenā nahīñ bhūltā

lekin ham bhuul jaate haiñ

ki mehrāb masjid ke hoñ yā māthoñ ke

nekiyoñ aur badiyoñ kā hisāb sirf ḳhudā ke paas hai

gin gin kar patthar mārne vaale

un kañkaroñ kī gintī bhuul chuke haiñ

jo abābīloñ ne hāthiyoñ par girā.e the

shahon ko KHabar nahin ho saki

ki bulldozeron se haTai gai mayyaton ki Dher mein

kis kis ke ehram par lahu ne aayaten raqam kin

hajiyon ki jama punji se munafea baTorti hukumaten

aab-e-zam-zam ke chashme aur petrol ke kuen mein

tamiz karna bhul jaen

to KHun ki lakir haram se nikal kar mina tak pahunch jati hai

shahi farman ko ibaadat ka darja dene wale

muftiyon ne ye kabhi nahin dekha

ki tariKH kai bar taKHt ko taKHta bante hue dekh chuki hai

shaitan ko patthar marta hua hujum

apne aap ko raund kar KHak mein mil jata hai

aur mansur anal-haq kah kar har daur mein amar hota raha

KHuda

nadamat ke aansu rone walon ko

muaf karne mein der nahin karta

aur shaitan intiqam lena nahin bhulta

lekin hum bhul jate hain

ki mehrab masjid ke hon ya mathon ke

nekiyon aur badiyon ka hisab sirf KHuda ke pas hai

gin gin kar patthar marne wale

un kankaron ki ginti bhul chuke hain

jo ababilon ne hathiyon par girae the