tariKH ki adalat

hamāre idrāk kī sadāqat

tumhāre ilzām kī najābat

kabhī to tārīḳh kī adālat meñ pesh hogī

halaf uThāne kī rasm se be-niyāz lamhe

tamām maflūj adl-gāhoñ kī maslahat-kesh-be-zabāni

lahū-faroshī ke kul dalā.el

dafātir-e-munsifī par tahrīr kar rahe haiñ

kabhī to tārīḳh kī adālat meñ

tum bhī aaoge

ham bhī ā.eñge

tum apne saare halīf laanā

qasīda-ḳhvānoñ kā majma.a-e-be-zamīr laanā

ḳhamīda-sar maslahat-pasandī ke zahr-ālūd tiir laanā

tum apnī māñgī huī shikasta sī teġh laanā

salīb laanā

aziyyatoñ ke nisāb laanā

har ek maqtal meñ dafn sho.aloñ kī raakh laanā

har ek pusht-e-bashar pe tahrīr vahshatoñ kī lakīr laanā

kabhī to tārīḳh kī adālat meñ

tum bhī aaoge ham bhī ā.eñge

ham apne hamrāh zinda lafzoñ ke phuul le kar

har ek dāman kī dhajjiyoñ kī dhanak meñ

poshīda zindagī ke usuul le kar

hazār-hā sar-kashīda kirnoñ kā nuur le kar

tamām bahnoñ ke āñchaloñ kā vaqār le kar

tamām maaoñ kī loriyoñ kā mazār le kar

yatīm palkoñ kī shabnamī ārzūoñ kā soz le kar

ham apnī un beTiyoñ kī māñgoñ kā husn le kar

ki jin kī sindūr ko khurach kar

tum aaj bārūd kī surañgeñ bichhā rahe ho

ham apnī dhartī ke zarre zarre meñ

sho.ala-afshāñ jalāl le kar

zarūr ā.eñge

jald ā.eñge

vo daur ab duur to nahīñ hai

ki vaqt jab munsifī karegā

kabhī to tārīḳh kī adālat meñ

tum bhī aaoge

ham bhī ā.eñge

hamare idrak ki sadaqat

tumhaare ilzam ki najabat

kabhi to tariKH ki adalat mein pesh hogi

halaf uThane ki rasm se be-niyaz lamhe

tamam mafluj adl-gahon ki maslahat-kesh-be-zabani

lahu-faroshi ke kul dalael

dafatir-e-munsifi par tahrir kar rahe hain

kabhi to tariKH ki adalat mein

tum bhi aaoge

hum bhi aaenge

tum apne sare halif lana

qasida-KHwanon ka majma-e-be-zamir lana

KHamida-sar maslahat-pasandi ke zahr-alud tir lana

tum apni mangi hui shikasta si tegh lana

salib lana

aziyyaton ke nisab lana

har ek maqtal mein dafn shoalon ki rakh lana

har ek pusht-e-bashar pe tahrir wahshaton ki lakir lana

kabhi to tariKH ki adalat mein

tum bhi aaoge hum bhi aaenge

hum apne hamrah zinda lafzon ke phul le kar

har ek daman ki dhajjiyon ki dhanak mein

poshida zindagi ke usul le kar

hazar-ha sar-kashida kirnon ka nur le kar

tamam bahnon ke aanchalon ka waqar le kar

tamam maon ki loriyon ka mazar le kar

yatim palkon ki shabnami aarzuon ka soz le kar

hum apni un beTiyon ki mangon ka husn le kar

ki jin ki sindur ko khurach kar

tum aaj barud ki surangen bichha rahe ho

hum apni dharti ke zarre zarre mein

shoala-afshan jalal le kar

zarur aaenge

jald aaenge

wo daur ab dur to nahin hai

ki waqt jab munsifi karega

kabhi to tariKH ki adalat mein

tum bhi aaoge

hum bhi aaenge