tabarruk

ye merī zindagī bhī ek majlis hai

moharram vaalī majlis

ye jaarī hai

na jaane kab talak jaarī rahegī

abhī tak to baḌī moTī bayāzeñ haath meñ thāme hue do chaar nauha-ḳhvān baaqī haiñ

ik to pahle hī bahut tāḳhīr is meñ ho chukī thī

vo kaafī der se aa.e the

jin ko soz paḌhnā thā

sab apnī apnī bāteñ kar rahe the

maiñ bhī ik kone meñ baiThā der tak suntā rahā sab kī

vo aa.e soz-ḳhvānī kī

aur us ke baa'd maulānā ne bhī taqrīr farmā.ī

fazā.el aa.e to maiñ ne bhī sab ke saath meñ nā're lagā.e

masā.ib aa.e to royā

aur ab halqe meñ mātam kar rahā huuñ maiñ

shabīheñ qumqume tuġhre

‘azā-ḳhāne meñ chhā.ī har taraf lobān kī ḳhushbū

muqaddas haiñ bahut achchhe haiñ

lekin kyūñ-ki mātam kar rahā huuñ maiñ

to mere haath thakte jā rahe haiñ

maiñ dublā patlā laḌkā huuñ

chalo merā 'aqīda hī bahut kamzor hogā

magar maiñ chāhtā huuñ

zarā sī der ko halqe se haT kar ek cigarette phūñk hī aa.uuñ

par aisā kar nahīñ saktā maiñ

kyūñki bānī-e-majlis ‘azā-ḳhāne ke darvāze pe baiThā hai

aur tabarruk to usī ko bāñTnā hai

to mātam kar rahā huuñ maiñ

to maiñ mātam karūñgā

chāhe kuchh ho

kyūñ-ki ab sab ke barābar hī tabarruk chāhiye mujh ko

ye meri zindagi bhi ek majlis hai

moharram wali majlis

ye jari hai

na jaane kab talak jari rahegi

abhi tak to baDi moTi bayazen hath mein thame hue do chaar nauha-KHwan baqi hain

ek to pahle hi bahut taKHir is mein ho chuki thi

wo kafi der se aae the

jin ko soz paDhna tha

sab apni apni baaten kar rahe the

main bhi ek kone mein baiTha der tak sunta raha sab ki

wo aae soz-KHwani ki

aur us ke ba'd maulana ne bhi taqrir farmai

fazael aae to main ne bhi sab ke sath mein na're lagae

masaib aae to roya

aur ab halqe mein matam kar raha hun main

shabihen qumqume tughre

‘aza-KHane mein chhai har taraf loban ki KHushbu

muqaddas hain bahut achchhe hain

lekin kyun-ki matam kar raha hun main

to mere hath thakte ja rahe hain

main dubla patla laDka hun

chalo mera 'aqida hi bahut kamzor hoga

magar main chahta hun

zara si der ko halqe se haT kar ek cigarette phunk hi aaun

par aisa kar nahin sakta main

kyunki bani-e-majlis ‘aza-KHane ke darwaze pe baiTha hai

aur tabarruk to usi ko banTna hai

to matam kar raha hun main

to main matam karunga

chahe kuchh ho

kyun-ki ab sab ke barabar hi tabarruk chahiye mujh ko