Tadfin

tadfīn

chaar taraf sannāTe kī dīvāreñ haiñ

aur markaz meñ ik taaza taaza qabr khudī hai

koī janāza aane vaalā hai

kuchh aur nahīñ to aaj shahādat kā kalma sunñe ko milegā

kānoñ ke ik sadī purāne qufl khuleñge

aaj mirī qallāsh samā.at ko āvāz kī daulat arzānī hogī

dīvāroñ ke saa.e meñ ik bahut baḌā amboh numāyāñ hotā hai

jo āhista āhista qabr kī jānib aatā hai

in logoñ ke qadmoñ kī koī chaap nahīñ hai

lab hilte haiñ lekin harf sadā banñe se pahle mar jaate haiñ

āñkhoñ se aañsū jaarī haiñ

lekin aañsū to vaise bhī

dil o dimāġh ke sannāToñ kī timsāleñ hote haiñ

mayyat qabr meñ utrī hai

aur hadd-e-nazar tak log bilakte hue dikhā.ī dete haiñ

aur sirf dikhā.ī dete haiñ

aur kaan dharo to sannāTe hī sunā.ī dete haiñ

jab qabr mukammal ho jaatī hai

ik būḌhā jo ''vaqt'' nazar aatā hai apne huliye se

hāthoñ meñ uThā.e katba qabr pe jhuktā hai

jab uThtā hai to katbe kā har harf garajne lagtā hai

ye lauh-e-mazār ''āvāz'' kī hai!

tadfin

chaar taraf sannaTe ki diwaren hain

aur markaz mein ek taza taza qabr khudi hai

koi janaza aane wala hai

kuchh aur nahin to aaj shahadat ka kalma sunne ko milega

kanon ke ek sadi purane qufl khulenge

aaj meri qallash samaat ko aawaz ki daulat arzani hogi

diwaron ke sae mein ek bahut baDa amboh numayan hota hai

jo aahista aahista qabr ki jaanib aata hai

in logon ke qadmon ki koi chap nahin hai

lab hilte hain lekin harf sada banne se pahle mar jate hain

aankhon se aansu jari hain

lekin aansu to waise bhi

dil o dimagh ke sannaTon ki timsalen hote hain

mayyat qabr mein utri hai

aur hadd-e-nazar tak log bilakte hue dikhai dete hain

aur sirf dikhai dete hain

aur kan dharo to sannaTe hi sunai dete hain

jab qabr mukammal ho jati hai

ek buDha jo waqt nazar aata hai apne huliye se

hathon mein uThae katba qabr pe jhukta hai

jab uThta hai to katbe ka har harf garajne lagta hai

ye lauh-e-mazar aawaz ki hai!