taDKHan

koī shīsha chaTaḳhtā hai

kisī billor kī taḌḳhan mire kānoñ tak aatī hai

sutūn-e-ustuḳhvāñ jis par mirā bām-e-shikasta hai yakāyak Dol jaatā hai

mirī gardan se kuchh nīche jahāñ ye riiḌh kī chob-e-sitāda kapkapī meñ hai

vahīñ visvās ke aur ḳhauf ke aur yaas ke jinnāt vahshat raag meñ apnā qadīmī giit gaate haiñ

tanāv is tarah jaise tanāb-e-jān khiñchtī ho

dabāo is tarah kā hai maiñ jaise qulzum-e-tārīk kī gahrā.iyoñ meñ huuñ

ki sab par zau-fishāñ sūraj jahāñ saaya nahīñ kartā

so rañg o raushnī ke aur harārat ke sandese bhī nahīñ aate

lahū juuñ bahr-e-āshufta sar-e-uftāñ ke sāhil se damādam sar paTaḳhtā hai

koī shīsha chaTaḳhtā hai

kisī billor kī taḌḳhan mire kānoñ tak aatī hai

koi shisha chaTaKHta hai

kisi billor ki taDKHan mere kanon tak aati hai

sutun-e-ustuKHwan jis par mera baam-e-shikasta hai yakayak Dol jata hai

meri gardan se kuchh niche jahan ye riDh ki chob-e-sitada kapkapi mein hai

wahin wiswas ke aur KHauf ke aur yas ke jinnat wahshat rag mein apna qadimi git gate hain

tanaw is tarah jaise tanab-e-jaan khinchti ho

dabao is tarah ka hai main jaise qulzum-e-tarik ki gahraiyon mein hun

ki sab par zau-fishan suraj jahan saya nahin karta

so rang o raushni ke aur hararat ke sandese bhi nahin aate

lahu jun bahr-e-ashufta sar-e-uftan ke sahil se damadam sar paTaKHta hai

koi shisha chaTaKHta hai

kisi billor ki taDKHan mere kanon tak aati hai