تغیر

کلینڈر کے بدلنے سے کہاں ماضی بدلتا ہے

پرانے زخم بھرتے ہیں بھلا آنکھوں کو بھرنے سے

جو دل پہ وار ہو جائے

اچانک ہار ہو جائے

انا کو ٹھیس جو پہنچے

دل و ہوش و خرد پہ بد حواسی ہو

بڑی گہری اداسی ہو

اسے جتنا بھی جھٹلاؤ

نہیں ممکن خلاصی ہو

سنو ہاتھوں میں تم جتنے کلینڈر تھام سکتے ہو

انہیں تم سامنے رکھ لو

ہزاروں ماہ تم پلٹو

ہزاروں سال سے گزرو

مگر جو سانحہ گزرا

تم اس کو بھول پاؤ گے

کلینڈر کو بدلنے سے پرانے غم نہیں مٹتے

ہزاروں مرہموں سے بھی یہ زخم جاں نہیں بھرتے

کلینڈر شوق سے پلٹو

مگر گزرے ہوئے لمحے نہ لوٹیں گے

کلینڈر کو بدلنے سے

مقدر تو نہ بدلیں گے