tahlil

maiñ raat aur din kī

masāfat meñ

rañgoñ kī tafsīr meñ

apne saare azīzoñ ke

apne hī hāthoñ se

qatl-e-musalsal meñ masrūf huuñ

phir maiñ kyuuñ sochtā huuñ

sar-e-jām, har shab

ki dīda-varī kī matā-e-firozāñ se

sarshār hotā

to har ḳhufta sar-basta tahrīr se

maiñ gale mil ke rotā

sadāoñ kī sargoshiyoñ meñ utartā

ajab hādsa hai ki kuchh der pahle

mire sāmne ek ghāyal parinda

girā hai mire paañv meñ

sāmne ke fasurda o be-barg

be-rañg se peḌ se

mere jām-e-shikasta meñ

baaqī the qatre mai-e-ḳhām ke kuchh

inheñ chashm-e-minqār se ye musāfir

baḌe ġhaur se dekhtā hai

inheñ gin rahā hai ye shāyad

maiñ sailāb-e-tahlīl meñ huuñ

yahāñ se kahāñ jā.ūñgā

duur gar jā saktā to vahāñ se

yahāñ lauT kar kis tarah

ā.ūñgā maiñ

main raat aur din ki

masafat mein

rangon ki tafsir mein

apne sare azizon ke

apne hi hathon se

qatl-e-musalsal mein masruf hun

phir main kyun sochta hun

sar-e-jam, har shab

ki dida-wari ki mata-e-firozan se

sarshaar hota

to har KHufta sar-basta tahrir se

main gale mil ke rota

sadaon ki sargoshiyon mein utarta

ajab hadsa hai ki kuchh der pahle

mere samne ek ghayal parinda

gira hai mere panw mein

samne ke fasurda o be-barg

be-rang se peD se

mere jam-e-shikasta mein

baqi the qatre mai-e-KHam ke kuchh

inhen chashm-e-minqar se ye musafir

baDe ghaur se dekhta hai

inhen gin raha hai ye shayad

main sailab-e-tahlil mein hun

yahan se kahan jaunga

dur gar ja sakta to wahan se

yahan lauT kar kis tarah

aaunga main