تہذیب

یہ مغرب ہے

یہاں تہذیب ہے

تعلیم ہے

اخلاق ہے

انسان میں انسانیت ہے

یہاں انساں کی قیمت ہے

تمدن ہے

ثقافت ہے

سکوں ہے

امن ہے

اور عافیت ہے

یہ مشرق ہے

یہاں تہذیب کم

تعلیم کم

اخلاق کم

تمدن کم

ثقافت کم

سکوں غائب

نہیں انسان میں انسانیت باقی کوئی

یہاں انسان کی قیمت نہیں ہے

ہر اک جانب بپا ہے

قتل و غارت

غضب ہے

جنگ ہے

اس پر مکمل بے حسی ہے

میں خود بھی مشرقی ہوں

اور مجھے اس پر ندامت ہے

مگر اس فکر شرمندہ کو پھر بھی

جسارت ہے

کہ میں یہ سوچتا ہوں

یہ سب نازیبا اور مکروہ ہتھیار

جو میرے سبزہ زاروں کو

جو میرے ریگزاروں کو

دھوئیں کی

خون کی

قبروں کی

اور مکروہ چیخوں کی

جواں سوغات دیتے ہیں

وہ سب مغرب میں بنتے ہیں

میں اپنے آپ سے حیران ہو کر اتنا کہتا ہوں

کہ مغرب تو مہذب ہے