tajdid

ab mire shāne se lag kar kis liye rotī ho tum

yaad hai tum ne kahā thā

''jab nigāhoñ meñ chamak ho

lafz jazboñ ke asar se kāñpte hoñ aur tanaffus

is tarah uljheñ ki jismoñ kī thakan ḳhushbū bane

to vo ghaḌī ahd-e-vafā kī sā.at-e-nāyāb hai

vo jo chupke se bichhaḌ jaate haiñ lamhe haiñ masāfat

jin kī ḳhātir paañv par pahre biThātī hai

nigāheñ dhund ke pardoñ meñ un ko DhūñDtī haiñ

aur samā.at un kī mīThī narm aahaT ke liye

dāman bichhātī hai''

aur vo lamha bhī tum ko yaad hogā

jab havā.eñ sard thiiñ aur shaam ke maile kafan par haath rakh kar

tum ne lafzoñ aur ta.alluq ke na.e ma.anī batā.e the, kahā thā

''har ghaḌī apnī jagah par sā.at-e-nāyāb hai

hāsil-e-umr-e-gurezāñ ek bhī lamha nahīñ

lafz dhoka haiñ ki un kā kaam iblāġh-e-ma.ānī ke alāva kuchh nahīñ

vaqt ma.anī hai jo har lahza na.e chehre badaltā hai

jaane vaalā vaqt saaya hai

ki jab tak jism hai ye aadmī ke saath chaltā hai

yaad misl-e-nutq pāgal hai ki is ke lafz ma.anī se tahī haiñ

ye jise tum ġham aziyyat dard aañsū

dukh vaġhaira kah rahe ho

ek lamhātī ta.assur hai tumhārā vahm hai

tum ko merā mashvara hai, bhuul jaao tum se ab tak

jo bhī kuchh maiñ ne kahā hai''

ab mire shāne se lag kar kis liye rotī ho tum!

ab mere shane se lag kar kis liye roti ho tum

yaad hai tum ne kaha tha

jab nigahon mein chamak ho

lafz jazbon ke asar se kanpte hon aur tanaffus

is tarah uljhen ki jismon ki thakan KHushbu bane

to wo ghaDi ahd-e-wafa ki saat-e-nayab hai

wo jo chupke se bichhaD jate hain lamhe hain masafat

jin ki KHatir panw par pahre biThati hai

nigahen dhund ke pardon mein un ko DhunDti hain

aur samaat un ki miThi narm aahaT ke liye

daman bichhati hai

aur wo lamha bhi tum ko yaad hoga

jab hawaen sard thin aur sham ke maile kafan par hath rakh kar

tum ne lafzon aur talluq ke nae mani batae the, kaha tha

har ghaDi apni jagah par saat-e-nayab hai

hasil-e-umr-e-gurezan ek bhi lamha nahin

lafz dhoka hain ki un ka kaam iblagh-e-maani ke alawa kuchh nahin

waqt mani hai jo har lahza nae chehre badalta hai

jaane wala waqt saya hai

ki jab tak jism hai ye aadmi ke sath chalta hai

yaad misl-e-nutq pagal hai ki is ke lafz mani se tahi hain

ye jise tum gham aziyyat dard aansu

dukh waghaira kah rahe ho

ek lamhati tassur hai tumhaara wahm hai

tum ko mera mashwara hai, bhul jao tum se ab tak

jo bhi kuchh main ne kaha hai

ab mere shane se lag kar kis liye roti ho tum!