tajdid-e-amal

uTh az-sar-e-nau dahr ke hālāt badal Daal

tadbīr se taqdīr ke din-rāt badal Daal

phir dars-e-musāvāt kī hājat hai jahāñ ko

āqā.ī-o-ḳhidmat ke ḳhitābāt badal Daal

kaalā ho ki gorā ho ḳhudā ek hai sab kā

qaumiyyat-e-bejā kī rivāyāt badal Daal

chīnī ho ki hindī ho barābar ke haiñ bhaa.ī

vataniyyat-e-mahdūd ke vahmāt badal Daal

kul chhoTe-baḌe ādam-e-ḳhākī ke haiñ farzand

har nasl se bezār ho har zaat badal Daal

aḳhlāq meñ tāqat hai fuzūñ teġh-o-sināñ se

paikār ke ye āhanī ālāt badal Daal

kyā zulm hai insān ho insān kā dushman

mardān-e-havas-kār kī ādāt badal Daal

mehnat se bhī mazdūr ko roTī nahīñ miltī

is banda-e-majbūr ke auqāt badal Daal

aapas meñ ye har roz kī ḳhūñ-reziyāñ kab tak

ḳhud-sāḳhta maz.hab kī rusūmāt badal Daal

hurriyat-e-kāmil kā vo e.ajāz dikhā tū

duniyā-e-ġhulāmī ke tilismāt badal Daal

ḳhilqat ko bulā shirk se tauhīd kī jānib

pīroñ kī faqīroñ kī karāmāt badal Daal

ta.alīm pe mauqūf hai rānā.i-e-afkār

behūda kitāboñ kī ḳhurāfāt badal Daal

kar fikr-e-amal zikr-e-ḳhat-o-ḳhāl abas hai

ai 'faiz' zarā apne ḳhayālāt badal Daal

uTh az-sar-e-nau dahr ke haalat badal Dal

tadbir se taqdir ke din-raat badal Dal

phir dars-e-musawat ki hajat hai jahan ko

aaqai-o-KHidmat ke KHitabaat badal Dal

kala ho ki gora ho KHuda ek hai sab ka

qaumiyyat-e-beja ki riwayat badal Dal

chini ho ki hindi ho barabar ke hain bhai

wataniyyat-e-mahdud ke wahmat badal Dal

kul chhoTe-baDe aadam-e-KHaki ke hain farzand

har nasl se bezar ho har zat badal Dal

aKHlaq mein taqat hai fuzun tegh-o-sinan se

paikar ke ye aahani aalat badal Dal

kya zulm hai insan ho insan ka dushman

mardan-e-hawas-kar ki aadat badal Dal

mehnat se bhi mazdur ko roTi nahin milti

is banda-e-majbur ke auqat badal Dal

aapas mein ye har roz ki KHun-reziyan kab tak

KHud-saKHta mazhab ki rusumat badal Dal

hurriyat-e-kaamil ka wo eajaz dikha tu

duniya-e-ghulami ke tilismat badal Dal

KHilqat ko bula shirk se tauhid ki jaanib

piron ki faqiron ki karamat badal Dal

talim pe mauquf hai ranai-e-afkar

behuda kitabon ki KHurafat badal Dal

kar fikr-e-amal zikr-e-KHat-o-KHal abas hai

ai 'faiz' zara apne KHayalat badal Dal