tajdid-e-mohabbat

huī muddat ki tujh se baat karne ko tarastā huuñ

maiñ huuñ ashkoñ kā bādal terī furqat meñ barastā huuñ

tire dil kī ġhalat-fahmī mire aañsū na dho paa.e

bane haiñ aaj jo virsa haiñ terī yaad ke saa.e

mujhe itnā batā de jān-e-man mujh se ḳhafā kyoñ hai

bhulā kar qaul apne aaj tū mujh se judā kyoñ hai

jo tū mujh se chhupātī hai na jaane raaz kaisā hai

nazar phūloñ pe rakh kar pyaar kāñToñ se ye kaisā hai

zabāñ par zikr merā hai karam us par dikhātī ho

ye ḳhat kis kā hai chupke se jo āñchal meñ chhupātī ho

tirī ye be-ruḳhī hamdam mujhe betāb kartī hai

mujhe bechain aksar sūrat-e-sīmāb kartī hai

kisī manzil pe kyā ab rāste phir mil nahīñ sakte

mohabbat ke fasurda phuul kyā phir khil nahīñ sakte

mujhe dīvāna kar degī tamanna tujh se milne kī

ijāzat de mohabbat kī kalī ko phir se khilne kī

mujhe phir se koī ḳhat phir koī paiġhām likh bhejo

nahīñ kuchh aur to kāġhaz pe apnā naam likh bhejo

hui muddat ki tujh se baat karne ko tarasta hun

main hun ashkon ka baadal teri furqat mein barasta hun

tere dil ki ghalat-fahmi mere aansu na dho pae

bane hain aaj jo wirsa hain teri yaad ke sae

mujhe itna bata de jaan-e-man mujh se KHafa kyon hai

bhula kar qaul apne aaj tu mujh se juda kyon hai

jo tu mujh se chhupati hai na jaane raaz kaisa hai

nazar phulon pe rakh kar pyar kanTon se ye kaisa hai

zaban par zikr mera hai karam us par dikhati ho

ye KHat kis ka hai chupke se jo aanchal mein chhupati ho

teri ye be-ruKHi hamdam mujhe betab karti hai

mujhe bechain aksar surat-e-simab karti hai

kisi manzil pe kya ab raste phir mil nahin sakte

mohabbat ke fasurda phul kya phir khil nahin sakte

mujhe diwana kar degi tamanna tujh se milne ki

ijazat de mohabbat ki kali ko phir se khilne ki

mujhe phir se koi KHat phir koi paigham likh bhejo

nahin kuchh aur to kaghaz pe apna nam likh bhejo