taKHliq

dard kī aag bujhā do ki abhī vaqt nahīñ

zaḳhm-e-dil jaag sake nashtar-e-ġham raqs kare

jo bhī sāñsoñ meñ ghulā hai use uryāñ na karo

chup bhī shola hai magar koī na ilzām dhare

aise ilzām ki ḳhud apne tarāshe hue but

jazba-e-kāvish-e-ḳhāliq ko nigūñ-sār kareñ

mū-qalam halqa-e-abrū ko banā de ḳhanjar

lafz nauhoñ meñ raqam mad.h-e-ruḳh-e-yār kareñ

raqs-e-mīnā se uThe naġhma-e-raqs-e-bismil

saaz ḳhud apne muġhannī ko gunahgār kareñ

marham-e-ashk nahīñ zaḳhm-e-talab kā chāra

ḳhuuñ bhī ro.o.ge to kis ḳhaak kī saj-dhaj hogī

kāñpte hāthoñ se TuuTī huī buniyādoñ par

jo bhī dīvār uThāoge vahī kaj hogī

koī patthar ho ki naġhma koī paikar ho ki rañg

jo bhī tasvīr banāoge apāhaj hogī

dard ki aag bujha do ki abhi waqt nahin

zaKHm-e-dil jag sake nashtar-e-gham raqs kare

jo bhi sanson mein ghula hai use uryan na karo

chup bhi shola hai magar koi na ilzam dhare

aise ilzam ki KHud apne tarashe hue but

jazba-e-kawish-e-KHaliq ko nigun-sar karen

mu-qalam halqa-e-abru ko bana de KHanjar

lafz nauhon mein raqam madh-e-ruKH-e-yar karen

raqs-e-mina se uThe naghma-e-raqs-e-bismil

saz KHud apne mughanni ko gunahgar karen

marham-e-ashk nahin zaKHm-e-talab ka chaara

KHun bhi rooge to kis KHak ki saj-dhaj hogi

kanpte hathon se TuTi hui buniyaadon par

jo bhi diwar uThaoge wahi kaj hogi

koi patthar ho ki naghma koi paikar ho ki rang

jo bhi taswir banaoge apahaj hogi