taKHliq

nābūd ke kāmil sannāTe meñ

zehn-e-āfāqī

shor ḳhayāloñ kā apne suntā hai

āmāq kī tārīkī se ubhar kar

nuur kā ek aazam zarra

shaq ho ke adam ke sannāTe ko toḌtā hai

pīThoñ pe havā-e-shamsī mārtī hai durre...

duurī harakat meñ aate haiñ sākit kurre

afkār kā varta bain-un-najm ḳhalāoñ meñ

āvāz-e-muhīb se ghūmtā hai

sūraj ke daraḳhshāñ bātin meñ

tārīkī kā pur-haul hayūlā kūdtā hai

shab kī aqlīm ke haikal par

kaalā bādal apnā bijlī kā sah shanāḳha lahrātā hai

ḳhud se mubāriz-andesha

sañgīñ kohsār meñ Dhaltā hai

jis kī maḳhrūtī choTī se

pātāl kī gahrā.ī kā ḳhabt uchhaltā hai

faulādī paanī maujoñ kī talvāroñ se

patthar ki chaTāneñ kāTtā hai

āshob vafūr-e-qudrat kā

bahr-e-zaḳhḳhār kī tah meñ paltā hai

talbīda taulīd pe sāhil se sarzan

maḳhlūq kasīr-ul-āzā kā shevan

tashkīl meñ hai aamil quvvat kā mansūba...

kohre se zāhir hotā hai ik kashtī kā ḳhāka

mastūl ke bal ḳhāmoshī se jo

tūfāñ vāsil hotā hai

matlūb, nihāñ-ḳhāne meñ apne rūh-e-insānī

dahshat kī god meñ bālīda hotī hai

nabud ke kaamil sannaTe mein

zehn-e-afaqi

shor KHayalon ka apne sunta hai

aamaq ki tariki se ubhar kar

nur ka ek aazam zarra

shaq ho ke adam ke sannaTe ko toDta hai

piThon pe hawa-e-shamsi marti hai durre

duri harakat mein aate hain sakit kurre

afkar ka warta bain-un-najm KHalaon mein

aawaz-e-muhib se ghumta hai

suraj ke daraKHshan baatin mein

tariki ka pur-haul hayula kudta hai

shab ki aqlim ke haikal par

kala baadal apna bijli ka sah shanaKHa lahraata hai

KHud se mubariz-andesha

sangin kohsar mein Dhalta hai

jis ki maKHruti choTi se

patal ki gahrai ka KHabt uchhalta hai

fauladi pani maujon ki talwaron se

patthar ki chaTanen kaTta hai

aashob wafur-e-qudrat ka

bahr-e-zaKHKHar ki tah mein palta hai

talbida taulid pe sahil se sarzan

maKHluq kasir-ul-aza ka shewan

tashkil mein hai aamil quwwat ka mansuba

kohre se zahir hota hai ek kashti ka KHaka

mastul ke bal KHamoshi se jo

tufan wasil hota hai

matlub, nihan-KHane mein apne ruh-e-insani

dahshat ki god mein baalida hoti hai