تخلیق مجازی

یہ داستاں کا سیہ سمندر

کہ جس کی موجیں مری صدا ہیں

جو میرے اندر

ازل کی سب خامشی سمیٹے

ابد کی ہر تیرگی چھپائے

دھڑک رہا ہے

وہی خموشی جو حرف کا اصل ذائقہ ہے

وہی اندھیرا جو ہر اجالے کی ابتدا ہے

یہ روح نغمہ یہ ساز ہستی

یہی حقیقت یہی گماں ہے

اسی سے میرا وجود ممکن

اسی سے تشکیل دو جہاں ہے

میں اس مقدس گھنے سمندر سے قطرہ قطرہ

نئے فسانے نکالتا ہوں

میں اس کے گمبھیر پانیوں کو

گماں کے پیکر میں ڈھالتا ہوں

مگر یہ سیال صورتیں جو

مآل ہیں میری کوششوں کا

میں ان کو پہچانتا نہیں ہوں

کہاں سے ابھرے ہیں نقش ان کے

یہ راز میں جانتا نہیں ہوں

ہوں خالق کائنات لیکن

خدا نہیں ہوں