taKHrib-karon ki shahadat

ek din jannat meñ bolā ik shahīd-e-haq-shanās

maslak-e-haq par nahīñ hai merī jannat kī asaas

qātil o zālim dar-e-jannat pe mañDlāne lage

arz-e-pakistan se kitne shahīd aane lage

sāmne jannat ke ye jo ḳhema-e-arvāh hai

ye inhīñ ja.alī shahīdoñ kī iqāmat-gāh hai

ye shahīd-e-haq samajh baiThe haiñ apne-āp ko

maiñ to jannat meñ na aane dūñgā in ke baap ko

ye agar jannat meñ dāḳhil ho ga.e sirf ek baar

phir kahāñ jā.eñge ham jaise shahīd-e-haq-shi.ār

duudh kī naharoñ meñ kuchh paanī milā deñge ye log

shahad kī naddī ko Theke par uThā deñge ye log

qaumiyat kā mas.ala phir se jagā deñge ye log

merī jannat ke ka.ī suube banā deñge ye log

dahshateñ jannat meñ le ā.eñge pakistan se

huur ko iġhvā karā leñge kisī ġhilmān se

aa.i.e maiñ in shahīdoñ ko milā.ūñ aap se

aap thoḌī duur haiñ jannat ke bus-stop se

aap se miliye ye dushman ke bahut hamdard haiñ

aap shaklan hī nahīñ naslan bhī dahshat-gard haiñ

dahshateñ ik policy haiñ jis ke maker aap haiñ

tīsrī duniyā ke pahle high-jecker aap haiñ

ye shahīd-e-bā-vafā haiñ mārte the bol ke

rail kī paTrī ke purze darmiyāñ se khol ke

lamha-e-Dāka-zanī siine pe golī khaa.ī thī

aap ne ik bank ke andar shahādat paa.ī thī

aap pakistan ke ik rahbar-e-mumtāz haiñ

saiñkaḌoñ rūheñ yahāñ bhī in kī ham-āvāz haiñ

phir shahīd-e-haq ye bolā ai ḳhuda-e-zul-jalāl

ālam-e-arvāh se ja.alī shahīdoñ ko nikāl

qādir-e-mutlaq hai tū in ko dobāra age de

in shahīdoñ ko tū duniyā hī meñ vāpas bhej de

ek din jannat mein bola ek shahid-e-haq-shanas

maslak-e-haq par nahin hai meri jannat ki asas

qatil o zalim dar-e-jannat pe manDlane lage

arz-e-pakistan se kitne shahid aane lage

samne jannat ke ye jo KHema-e-arwah hai

ye inhin jali shahidon ki iqamat-gah hai

ye shahid-e-haq samajh baiThe hain apne-ap ko

main to jannat mein na aane dunga in ke bap ko

ye agar jannat mein daKHil ho gae sirf ek bar

phir kahan jaenge hum jaise shahid-e-haq-shiar

dudh ki naharon mein kuchh pani mila denge ye log

shahad ki naddi ko Theke par uTha denge ye log

qaumiyat ka masala phir se jaga denge ye log

meri jannat ke kai sube bana denge ye log

dahshaten jannat mein le aaenge pakistan se

hur ko ighwa kara lenge kisi ghilman se

aaie main in shahidon ko milaun aap se

aap thoDi dur hain jannat ke bus-stop se

aap se miliye ye dushman ke bahut hamdard hain

aap shaklan hi nahin naslan bhi dahshat-gard hain

dahshaten ek policy hain jis ke maker aap hain

tisri duniya ke pahle high-jecker aap hain

ye shahid-e-ba-wafa hain marte the bol ke

rail ki paTri ke purze darmiyan se khol ke

lamha-e-Daka-zani sine pe goli khai thi

aap ne ek bank ke andar shahadat pai thi

aap pakistan ke ek rahbar-e-mumtaz hain

sainkaDon ruhen yahan bhi in ki ham-awaz hain

phir shahid-e-haq ye bola ai KHuda-e-zul-jalal

aalam-e-arwah se jali shahidon ko nikal

qadir-e-mutlaq hai tu in ko dobara age de

in shahidon ko tu duniya hi mein wapas bhej de