takmil

vo tīrgī bhī ajiib thī

chāñdnī kī ThanDī gudāz chādar se saarā jañgal lipaT rahā thā

guloñ ke sad-rañg

dhuñdle dhuñdle se

jaise ik sīm-tan ke chehre ke shoḳh ġhāze pe

āñsuoñ kā ġhubār ho

peḌ, muntazir

apnī narm shāḳhoñ ke haath phailā.e

aur kabhī koī shāḳh chaTkī

to saa.e nikle

mulūk phūloñ ko chuum kar

chāñdnī kī chādar pe nāchte the

kahāñ se aa.ī

vo ik kiran

jis ne phailtī tīrgī kī gambhīrtā ko chīrā

to mere bhītar meñ ek kirnoñ kā silsila yuuñ utar rahā thā

ki koh-e-ātish-fashāñ se laavā nasheb ko bah rahā ho

mere lahū se soj ubal paḌe

jin kī tez hiddat se tīrgī ke muhīb yaḳh-basta sañg pighle

to nuur ke rāstoñ kā ik jaal khul gayā

magar abhī to muhīb kaale pahāḌ kuchh aur bhī nazar aa rahe haiñ

aur maiñ safar kī hiddat se jal rahā huuñ

zarā maiñ ab chāñdnī kī ThanDī gudāz-chādar meñ

dam to le luuñ

kahīñ ubaltī huī ye ātish

mujhe jalā kar bhasm na kar de

wo tirgi bhi ajib thi

chandni ki ThanDi gudaz chadar se sara jangal lipaT raha tha

gulon ke sad-rang

dhundle dhundle se

jaise ek sim-tan ke chehre ke shoKH ghaze pe

aansuon ka ghubar ho

peD, muntazir

apni narm shaKHon ke hath phailae

aur kabhi koi shaKH chaTki

to sae nikle

muluk phulon ko chum kar

chandni ki chadar pe nachte the

kahan se aai

wo ek kiran

jis ne phailti tirgi ki gambhirta ko chira

to mere bhitar mein ek kirnon ka silsila yun utar raha tha

ki koh-e-atish-fashan se lawa nasheb ko bah raha ho

mere lahu se soj ubal paDe

jin ki tez hiddat se tirgi ke muhib yaKH-basta sang pighle

to nur ke raston ka ek jal khul gaya

magar abhi to muhib kale pahaD kuchh aur bhi nazar aa rahe hain

aur main safar ki hiddat se jal raha hun

zara main ab chandni ki ThanDi gudaz-chadar mein

dam to le lun

kahin ubalti hui ye aatish

mujhe jala kar bhasm na kar de