takmil

rag-e-nigāh meñ nashtar chubho ke uTThā huuñ

dayār-e-zīst shikasta-nuqūsh se pur hai

magar nigāh ko hai ishq dasht-e-imkāñ se

mirī nigāh meñ takmīl kā yaqīñ na sahī

mirī nigāh meñ takmīl kā irāda hai

uThā hai jo bhī qadam rāh-e-zindagī pe use

hazār rang masarrat kā jā.eza le kar

ġham-e-hayāt ke hoñToñ ne baḌh ke chuum liyā

jabīneñ fart-e-nashāt-o-tarab kī mastī meñ

javāñ ḳhayāl irādoñ ke āstānoñ par

vafūr-e-faḳhr-e-ta'alluq meñ jhuktī jaatī haiñ

ta'alluqāt se qaa.em hai dahr kī raunaq

ta'alluqāt pe mabnī hai zindagī kā vajūd

ta'alluqāt ki jin ke tufail har lamha

ġham-e-hayāt abad par nigāh rakhtā hai

ġham-e-hayāt shab-o-roz kī ragoñ meñ jise

har ek lamha nayā ḳhuun paidā karnā hai

azal kī aañkh taqāzā namī kā kartī hai

azal kī aañkh ba-sad-kaif rotī rahtī hai

nigāh-e-zīst meñ ra.anā.iyoñ kā rang-e-latīf

sukūñ-pazīr ḳhayāloñ ko loriyāñ de kar

udaas sāyoñ kī taqdīr bantā jaatā hai

ġham-e-hayāt kī rangīniyoñ ke saaye meñ

jahān-e-dard ke sāmāñ panapte rahte haiñ

in āñsūoñ ke javāñ-azm kārvānoñ ko

abad kī manzil-e-nādīda-o-ajab kī taraf

junūñ kā josh liye raah raah baḌhne do

fareb-e-marg vo nāsūr hai jise ab tak

fareb-e-zīst ke phāhe na raam kar paa.e

ta'alluqāt kī pur-josh mauj-e-bahr-e-ḳhayāl

hazār moḌ liye sāhiloñ se Takrā kar

na.e ḳhayāl ke naqshe banātī jaatī hai

na.e vajūd safīnoñ kā ruup lete haiñ

na.ī nigāh sitāroñ se baat kartī hai

na.e fareb-e-nazar ko asiir karte haiñ

fareb jin pe taġhāful kī gard jam jam kar

rah-e-ḳhayāl ko hamvār kartī jaatī hai

mujhe yaqīñ hai shikastoñ ke silsile ik din

navā-e-vaj.h-e-vajūd-o-ḳhayāl ko sun kar

na.e-navele ta.ajjub ko jā ke chhū leñge

jahāñ hayāt kī āñkhoñ se ashk ban ban kar

abad ke raaz Tapakne ke muntazir hoñge

jahāñ shikast ke dāman meñ kāmrāñ lamhe

fazā-e-vaqt ko le kar simaT rahe hoñge

jahāñ nigāh taḳhayyul kī ham-navā ho kar

ta'alluqāt ke rangīn giit gā.egī

vo jis maqām pe takmīl-e-ārzū bhī nahīñ

vo jis maqām pe har kashmakash ke qadmoñ ko

thakan kī had pe sukūñ aa ke chuum letā hai

usī maqām kī derīna justujū ke tufail

rag-e-nigāh meñ nashtar chubho ke uTThā huuñ

rag-e-nigah mein nashtar chubho ke uTTha hun

dayar-e-zist shikasta-nuqush se pur hai

magar nigah ko hai ishq dasht-e-imkan se

meri nigah mein takmil ka yaqin na sahi

meri nigah mein takmil ka irada hai

uTha hai jo bhi qadam rah-e-zindagi pe use

hazar rang masarrat ka jaeza le kar

gham-e-hayat ke honTon ne baDh ke chum liya

jabinen fart-e-nashat-o-tarab ki masti mein

jawan KHayal iradon ke aastanon par

wafur-e-faKHr-e-ta'alluq mein jhukti jati hain

ta'alluqat se qaem hai dahr ki raunaq

ta'alluqat pe mabni hai zindagi ka wajud

ta'alluqat ki jin ke tufail har lamha

gham-e-hayat abad par nigah rakhta hai

gham-e-hayat shab-o-roz ki ragon mein jise

har ek lamha naya KHun paida karna hai

azal ki aankh taqaza nami ka karti hai

azal ki aankh ba-sad-kaif roti rahti hai

nigah-e-zist mein ranaiyon ka rang-e-latif

sukun-pazir KHayalon ko loriyan de kar

udas sayon ki taqdir banta jata hai

gham-e-hayat ki ranginiyon ke saye mein

jahan-e-dard ke saman panapte rahte hain

in aansuon ke jawan-azm karwanon ko

abad ki manzil-e-nadida-o-ajab ki taraf

junun ka josh liye rah rah baDhne do

fareb-e-marg wo nasur hai jise ab tak

fareb-e-zist ke phahe na ram kar pae

ta'alluqat ki pur-josh mauj-e-bahr-e-KHayal

hazar moD liye sahilon se Takra kar

nae KHayal ke naqshe banati jati hai

nae wajud safinon ka rup lete hain

nai nigah sitaron se baat karti hai

nae fareb-e-nazar ko asir karte hain

fareb jin pe taghaful ki gard jam jam kar

rah-e-KHayal ko hamwar karti jati hai

mujhe yaqin hai shikaston ke silsile ek din

nawa-e-wajh-e-wajud-o-KHayal ko sun kar

nae-nawele tajjub ko ja ke chhu lenge

jahan hayat ki aankhon se ashk ban ban kar

abad ke raaz Tapakne ke muntazir honge

jahan shikast ke daman mein kaamran lamhe

faza-e-waqt ko le kar simaT rahe honge

jahan nigah taKHayyul ki ham-nawa ho kar

ta'alluqat ke rangin git gaegi

wo jis maqam pe takmil-e-arzu bhi nahin

wo jis maqam pe har kashmakash ke qadmon ko

thakan ki had pe sukun aa ke chum leta hai

usi maqam ki derina justuju ke tufail

rag-e-nigah mein nashtar chubho ke uTTha hun