talash-e-gum-gashta

ye tamanna kā laavā pighal kar rahegā

vo jo sadiyoñ se mere dil-e-muztarib meñ dabā thā

vo āñkhoñ ke raste bahegā

ki bahnā azal ko abad se milātā hai

par koī miltā nahīñ

kyā bichhaḌne ke imkān ko

merī taġhāroñ meñ bone kā maqsad yahī thā

ki maiñ tujh se duurī pe

qarya-ba-qarya bichhaḌne kā nauha kahūñ

kyā kahūñ ki tū ḳhāmoshiyoñ ko bhī

sāñsoñ ke tāroñ pe bajtī huī

dhun meñ suntā hai

kaisā mo'amma hai jo hal na hone kā sāmān

mere ḳhayāloñ kī

almāriyoñ meñ sajātā chalā jā rahā hai

mujh ko qaidī karo

aur merī talātum meñ bahte samundar ko

āvāz do

taaki maiñ terī vus'at kā andāza kartā chalūñ

aañkh kī putliyoñ meñ

hamāre bichhaḌne pe taalī bajāte hue

sab tamāshā.iyoñ ko bhī qaidī karo

taaki vo bhī to jāneñ

us an-dekhī quvvat kā dukh

jo hameñ ek duuje ko

duurī pe majbūr kartī hai

par vo dikhā.ī nahīñ de rahī

kyā dikhāvā zarūrī hai

is imbisāt-e-jahāñ meñ

nahīñ hai agar tū tasadduq-shi’ārī pe māmūr

ham ko batā.eñ

zamīnī kahāvat pe ḳhanda-zanī karne vaale

batā.eñ hameñ

vo jo maujūd hai par dikhā.ī nahīñ de rahā hai

kahāñ hai

ye tamanna ka lawa pighal kar rahega

wo jo sadiyon se mere dil-e-muztarib mein daba tha

wo aankhon ke raste bahega

ki bahna azal ko abad se milata hai

par koi milta nahin

kya bichhaDne ke imkan ko

meri taghaaron mein bone ka maqsad yahi tha

ki main tujh se duri pe

qarya-ba-qarya bichhaDne ka nauha kahun

kya kahun ki tu KHamoshiyon ko bhi

sanson ke taron pe bajti hui

dhun mein sunta hai

kaisa mo'amma hai jo hal na hone ka saman

mere KHayalon ki

almariyon mein sajata chala ja raha hai

mujh ko qaidi karo

aur meri talatum mein bahte samundar ko

aawaz do

taki main teri wus'at ka andaza karta chalun

aankh ki putliyon mein

hamare bichhaDne pe tali bajate hue

sab tamashaiyon ko bhi qaidi karo

taki wo bhi to jaanen

us an-dekhi quwwat ka dukh

jo hamein ek duje ko

duri pe majbur karti hai

par wo dikhai nahin de rahi

kya dikhawa zaruri hai

is imbisat-e-jahan mein

nahin hai agar tu tasadduq-shi’ari pe mamur

hum ko bataen

zamini kahawat pe KHanda-zani karne wale

bataen hamein

wo jo maujud hai par dikhai nahin de raha hai

kahan hai