talash-e-mahbub

kisī ne mujh se kahā tū chaman meñ rahtā hai

guloñ kī mahkī huī anjuman meñ rahtā hai

magar kisī bhī chaman meñ tirā nishāñ na milā

patā chalā ki hai kunj-e-sadaf meñ terā ghar

muqīm rahtā hai tū us meñ ban ke āb-e-guhar

magar kahīñ bhī tirā bahr-e-bekarāñ na milā

tirī gulābī-e-shabnam meñ justujū kī hai

havā ke gesū-e-barham meñ justujū kī hai

magar kahīñ bhī tirī zulf kā dhuāñ na milā

ġhazāl-e-ra.anā se maiñ ne kabhī tujhe pūchhā

ġhubār-e-sahrā se maiñ ne kabhī tujhe pūchhā

fazā-e-dasht meñ bhī terā kārvāñ na milā

kabhī falak kī ghaTā meñ tujhe talāsh kiyā

kabhī shafaq kī hinā meñ tujhe talāsh kiyā

kisī jagah bhī magar terā āstāñ na milā

mujhe ḳhabar milī kāshāna hai tirā mahtāb

tū chashm-e-māh meñ rahtā hai ban ke rangīñ ḳhvāb

tirā surāġh magar sū-e-kahkashāñ na milā

tū hī batā ki tujhe maiñ kahāñ talāsh karūñ

maiñ kis jagah tujhe nūr-e-ravāñ talāsh karūñ

jahāñ-jahāñ maiñ gayā tū vahāñ-vahāñ na milā

koī uThā na sakā tere parda-hā-e-nāz

zamīn-o-charḳh pe koī nahīñ hai mahram-e-rāz

tujhe batā.e koī aisā nukta-dāñ na milā

kisi ne mujh se kaha tu chaman mein rahta hai

gulon ki mahki hui anjuman mein rahta hai

magar kisi bhi chaman mein tera nishan na mila

pata chala ki hai kunj-e-sadaf mein tera ghar

muqim rahta hai tu us mein ban ke aab-e-guhar

magar kahin bhi tera bahr-e-bekaran na mila

teri gulabi-e-shabnam mein justuju ki hai

hawa ke gesu-e-barham mein justuju ki hai

magar kahin bhi teri zulf ka dhuan na mila

ghazal-e-rana se main ne kabhi tujhe puchha

ghubar-e-sahra se main ne kabhi tujhe puchha

faza-e-dasht mein bhi tera karwan na mila

kabhi falak ki ghaTa mein tujhe talash kiya

kabhi shafaq ki hina mein tujhe talash kiya

kisi jagah bhi magar tera aastan na mila

mujhe KHabar mili kashana hai tera mahtab

tu chashm-e-mah mein rahta hai ban ke rangin KHwab

tera suragh magar su-e-kahkashan na mila

tu hi bata ki tujhe main kahan talash karun

main kis jagah tujhe nur-e-rawan talash karun

jahan-jahan main gaya tu wahan-wahan na mila

koi uTha na saka tere parda-ha-e-naz

zamin-o-charKH pe koi nahin hai mahram-e-raaz

tujhe batae koi aisa nukta-dan na mila