talash

vo bachcha kahāñ hai

jo kah de ki hazrat-salāmat

ye sab log malbūs-e-shāhī kā iqrār karte raheñ

mujh ko to aap nañge nazar aa rahe haiñ

vo bachcha jo itnī purānī kahānī meñ zinda chalā aa rahā hai

hamāre vatan meñ bhī hogā

hamāre vatan meñ bhī hogā

Darī aur sahmī magar phir bhī jaarī ye āvāz dil chīrtī hai

hamāre vatan meñ bhī hogā

hamāre vatan meñ bhī hogā

maiñ darbāriyoñ meñ to kyā naukaroñ ke jilau meñ bahut duur baiThā

libās-e-shāhī kā madah-ḳhvāñ to ab bhī nahīñ

ishāroñ kināyoñ

alāmāt se yā ḳhurāfāt se

kuchh na kuchh nazm meñ kuchh na kuchh nasr meñ baḌbaḌātā rahā huuñ

magar vaañ bhī yaañ kā ye afsāna sab ko sunātā rahā huuñ

vo 'ġhālib' na ho aur 'jālib' rahe phir bhī aisā hī bachcha

hamāre vatan meñ bhī hai

aur rahegā

wo bachcha kahan hai

jo kah de ki hazrat-salamat

ye sab log malbus-e-shahi ka iqrar karte rahen

mujh ko to aap nange nazar aa rahe hain

wo bachcha jo itni purani kahani mein zinda chala aa raha hai

hamare watan mein bhi hoga

hamare watan mein bhi hoga

Dari aur sahmi magar phir bhi jari ye aawaz dil chirti hai

hamare watan mein bhi hoga

hamare watan mein bhi hoga

main darbariyon mein to kya naukaron ke jilau mein bahut dur baiTha

libas-e-shahi ka madah-KHwan to ab bhi nahin

ishaaron kinayon

alamat se ya KHurafat se

kuchh na kuchh nazm mein kuchh na kuchh nasr mein baDbaData raha hun

magar wan bhi yan ka ye afsana sab ko sunata raha hun

wo 'ghaalib' na ho aur 'jalib' rahe phir bhi aisa hi bachcha

hamare watan mein bhi hai

aur rahega