talKH-o-tursh

kyuuñ mirī talḳh-navā.ī se ḳhafā hote ho

zahr hī mujh ko milā zahr piyā hai maiñ ne

koī is dasht-e-junūñ meñ mirī vahshat dekhe

apne hī chāk-e-garebāñ ko siyā hai maiñ ne

dair o ka.aba meñ jalā.e mirī vahshat ne charāġh

merī mehrāb-e-tamannā meñ añdherā hī rahā

ruḳh-e-tārīḳh pe hai mere lahū kā ġhāza

phir bhī hālāt kī ā.ankhoñ meñ khaTaktā hī rahā

maiñ ne khīñchī hai ye mai maiñ ne hī Dhāle haiñ ye jaam

par azal se jo maiñ pyāsā thā to pyāsā hī rahā

ye hasīñ atlas-o-kam-ḳhvāb bune haiñ maiñ ne

mere hisse meñ magar duur kā jalva hī rahā

mujh pe ab tak na paḌī mere masīhā kī nazar

mere ḳhvāboñ kī ye bechain zuleḳhā.eñ haiñ

jin ko ta.abīr kā vo yūsuf-e-kan.āñ na milā

maiñ ne har lahja meñ logoñ se kahī baat magar

jo mirī baat samajhtā vo suḳhan-dāñ na milā

kufr o islām kī ḳhalvat meñ bhī jalvat meñ bhī

koī kāfir na milā koī musalmāñ na milā

mere māthe kā araq Dhaltā hai Taksāloñ meñ

par mirī jeb mire haath se sharmā.ī hai

kabhī maiñ baḌh ke thapak detā huuñ ruḳhsār-e-hayāt

zindagī baiTh ke mujh ko kabhī samjhātī hai

raat Dhaltī hai to sannāTe kī pagDanDī par

apne ḳhvāboñ ke tasavvur se hayā aatī hai

kyuuñ mirī talḳh-navā.ī se ḳhafā hote ho

merī āvāz ko ye zahr diyā hai kis ne

kyun meri talKH-nawai se KHafa hote ho

zahr hi mujh ko mila zahr piya hai main ne

koi is dasht-e-junun mein meri wahshat dekhe

apne hi chaak-e-gareban ko siya hai main ne

dair o kaba mein jalae meri wahshat ne charagh

meri mehrab-e-tamanna mein andhera hi raha

ruKH-e-tariKH pe hai mere lahu ka ghaza

phir bhi haalat ki aaankhon mein khaTakta hi raha

main ne khinchi hai ye mai main ne hi Dhaale hain ye jam

par azal se jo main pyasa tha to pyasa hi raha

ye hasin atlas-o-kam-KHwab bune hain main ne

mere hisse mein magar dur ka jalwa hi raha

mujh pe ab tak na paDi mere masiha ki nazar

mere KHwabon ki ye bechain zuleKHaen hain

jin ko tabir ka wo yusuf-e-kanan na mila

main ne har lahja mein logon se kahi baat magar

jo meri baat samajhta wo suKHan-dan na mila

kufr o islam ki KHalwat mein bhi jalwat mein bhi

koi kafir na mila koi musalman na mila

mere mathe ka araq Dhalta hai Taksalon mein

par meri jeb mere hath se sharmai hai

kabhi main baDh ke thapak deta hun ruKHsar-e-hayat

zindagi baiTh ke mujh ko kabhi samjhati hai

raat Dhalti hai to sannaTe ki pagDanDi par

apne KHwabon ke tasawwur se haya aati hai

kyun meri talKH-nawai se KHafa hote ho

meri aawaz ko ye zahr diya hai kis ne