tamasha ban gae

kyā tamāshā hai tamāshā-gar tamāshā ban ga.e

kyā samajhte the unheñ ham aur vo kyā ban ga.e

kyoñ na mar jaa.eñ marīzān-e-mohabbat rashk se

jo kabhī bīmār the vo ḳhud masīhā ban ga.e

un ke charche daur-e-hāzir kī sunahrī dāstāñ

apne qisse ahd-e-māzī kā fasāna ban ga.e

ab koī dekhe to kyā samjhe to kyā soche to kyā

jalve uTh kar dīda-e-hairāñ kā pardā ban ga.e

jaan kar apnā sar āñkhoñ par biThāyā thā jinheñ

jaan ke dushman vahī jān-e-tamannā ban ga.e

muḳhtasar hogā 'rishī' kyūñkar bayān-e-āshiqī

haal kyā kyā ho ga.e ahvāl kyā kyā ban ga.e

kya tamasha hai tamasha-gar tamasha ban gae

kya samajhte the unhen hum aur wo kya ban gae

kyon na mar jaen marizan-e-mohabbat rashk se

jo kabhi bimar the wo KHud masiha ban gae

un ke charche daur-e-hazir ki sunahri dastan

apne qisse ahd-e-mazi ka fasana ban gae

ab koi dekhe to kya samjhe to kya soche to kya

jalwe uTh kar dida-e-hairan ka parda ban gae

jaan kar apna sar aankhon par biThaya tha jinhen

jaan ke dushman wahi jaan-e-tamanna ban gae

muKHtasar hoga 'rishi' kyunkar bayan-e-ashiqi

haal kya kya ho gae ahwal kya kya ban gae