tamazat

maiñ apnī umr kī aadhī sadī guzār aaya

yahīñ se fikr meñ sanjīdgī ubhartī hai

ye umr ek dorāhā hai zindagī ke liye

ubhar sī aatī haiñ tabdīliyāñ ḳhayāloñ meñ

bikharne lagtī hai chāñdī bhī sar ke bāloñ meñ

ye aur baat ki aadhī sadī guzār aaya

ye aur baat ki sab kuchh badal gayā hai magar

tumhārā ruup vo hī hai jo kal thā āñkhoñ meñ

tumhāre husn-e-tabassum se pyaar hai ab bhī

vo dil-gudāz sā ik intizār hai ab bhī

hasīn chehroñ meñ tum ko talāsh kartā huuñ

taḳhaiyyulāt meñ ruḳhsār kī tamāzat hai

tumhāre āriz-e-ḳhush-rang kī shafaq ban kar

maiñ ḳhvāb ḳhvāb ka.ī hijr le ke aaya thā

sulagte lamhe the aur gesuoñ kā saayā thā

tumheñ to bichhḌe hue kitne saal biit ga.e

magar ye guzre hue māh-o-sāl achchhe haiñ

tumheñ jo dekhā nahīñ itnī der se maiñ ne

to aaj soch rahā huuñ ki ye bhī achchhā hai

ye hijr mere tumhāre liye ġhanīmat hai

mire ḳhayāl kī kis tarah shaan rah pātīñ

na tum bichhaḌtīñ to kaise javān rah pātīñ

main apni umr ki aadhi sadi guzar aaya

yahin se fikr mein sanjidgi ubharti hai

ye umr ek doraha hai zindagi ke liye

ubhar si aati hain tabdiliyan KHayalon mein

bikharne lagti hai chandi bhi sar ke baalon mein

ye aur baat ki aadhi sadi guzar aaya

ye aur baat ki sab kuchh badal gaya hai magar

tumhaara rup wo hi hai jo kal tha aankhon mein

tumhaare husn-e-tabassum se pyar hai ab bhi

wo dil-gudaz sa ek intizar hai ab bhi

hasin chehron mein tum ko talash karta hun

taKHaiyyulat mein ruKHsar ki tamazat hai

tumhaare aariz-e-KHush-rang ki shafaq ban kar

main KHwab KHwab kai hijr le ke aaya tha

sulagte lamhe the aur gesuon ka saya tha

tumhein to bichhDe hue kitne sal bit gae

magar ye guzre hue mah-o-sal achchhe hain

tumhein jo dekha nahin itni der se main ne

to aaj soch raha hun ki ye bhi achchha hai

ye hijr mere tumhaare liye ghanimat hai

mere KHayal ki kis tarah shan rah patin

na tum bichhaDtin to kaise jawan rah patin