tan-asani

ġhusl-ḳhāne meñ vo kahtī haiñ hameñ chīnī kī īñTeñ hī pasand aatī haiñ

chīnī kī īñToñ pe vo kahtī haiñ chhīñTā jo paḌe to pal meñ

ek ik buuñd bahut jald phisal jaatī hai

koī pūchhe ki bhalā būñdoñ ke yuuñ jald phisal jaane meñ

kyā fā.eda hai

jab zarūrat huī jī chāhā to chupke se ga.e aur nahā kar lauTe

dhul-dhulā kar yuuñ chale aa.e ki jis tarah kisī jhiil ke paanī pe koī murġhābī

ek dam Dupkī lagātī hai lagāte hī ubhar aatī hai

aur phir tairtī jaatī hai zarā ruktī nahīñ

vo ye kahtī haiñ magar chīnī kī īñToñ kā agar farsh ho dīvāreñ hoñ

dil ye kahtā hai ki har chiiz kā nikhrā huā rañg

āñkhoñ ko kitnā bhalā lagtā hai

jaise barsāt meñ tham jaate haiñ bādal jo baras kar to har ik phulvārī

yuuñ nazar aatī hai

jaise jaanā ho use apne kasī chāhne vaale se kahīñ milne ko jaanā ho magar

abhī kuchh soch meñ ho

koī pūchhe ki bhalā chīnī kī īñToñ ko kisī soch se kyā nisbat hai

chīnī kī īñTeñ to be-jān haiñ phulvārī meñ har phuul kalī har patta

ziist ke nuur se lahrātā hai

phuul murjhā.e kalī khiltī hai

aur har patta na.e phuul ke gun gaatā hai

chīnī kī īñTeñ koī giit nahīñ gā saktīñ

chīnī kī īñTeñ to ḳhāmosh rahā kartī haiñ

aisī ḳhāmoshī se uktā ke nahāne vaalā

kuchh is andāz se ik taan lagātā hai ki luqmān hī yaad aatā hai

jab maiñ ye kahtā huuñ vo pūchhtī haiñ

koī pūchhe to bhalā taan ko luqmān se kiyā nisbat hai

aur maiñ kahtā huuñ luqmān ko luqmān ko yā taan ko rahne do chalo

aur koī baat kareñ

aur yuuñ leTe hī rahte haiñ kisī ke dil meñ

dhyān aatā hī nahīñ

ġhusl-ḳhāne meñ qadam rakkheñ nahā kar so.eñ

leTe leTe yūñhī niind aatī hai so jaate haiñ

ghusl-KHane mein wo kahti hain hamein chini ki inTen hi pasand aati hain

chini ki inTon pe wo kahti hain chhinTa jo paDe to pal mein

ek ek bund bahut jald phisal jati hai

koi puchhe ki bhala bundon ke yun jald phisal jaane mein

kya faeda hai

jab zarurat hui ji chaha to chupke se gae aur naha kar lauTe

dhul-dhula kar yun chale aae ki jis tarah kisi jhil ke pani pe koi murghabi

ek dam Dupki lagati hai lagate hi ubhar aati hai

aur phir tairti jati hai zara rukti nahin

wo ye kahti hain magar chini ki inTon ka agar farsh ho diwaren hon

dil ye kahta hai ki har chiz ka nikhra hua rang

aankhon ko kitna bhala lagta hai

jaise barsat mein tham jate hain baadal jo baras kar to har ek phulwari

yun nazar aati hai

jaise jaana ho use apne kasi chahne wale se kahin milne ko jaana ho magar

abhi kuchh soch mein ho

koi puchhe ki bhala chini ki inTon ko kisi soch se kya nisbat hai

chini ki inTen to be-jaan hain phulwari mein har phul kali har patta

zist ke nur se lahraata hai

phul murjhae kali khilti hai

aur har patta nae phul ke gun gata hai

chini ki inTen koi git nahin ga saktin

chini ki inTen to KHamosh raha karti hain

aisi KHamoshi se ukta ke nahane wala

kuchh is andaz se ek tan lagata hai ki luqman hi yaad aata hai

jab main ye kahta hun wo puchhti hain

koi puchhe to bhala tan ko luqman se kiya nisbat hai

aur main kahta hun luqman ko luqman ko ya tan ko rahne do chalo

aur koi baat karen

aur yun leTe hi rahte hain kisi ke dil mein

dhyan aata hi nahin

ghusl-KHane mein qadam rakkhen naha kar soen

leTe leTe yunhi nind aati hai so jate hain