tanhai

is saf meñ bhī sab dushman haiñ

us saf meñ bhī sab dushman haiñ

jo āñkhoñ meñ āñkheñ Daale

aur dil meñ nafrat ko paale

bārūd ke Dher pe baiThe haiñ

bas ik saa.at kī duurī par

us insāñ kī majbūrī par

koī rone vaalā bhī to nahīñ

koī hañsne vaalā bhī to nahīñ

us sā.at-e-ḳhūñ-āshām se thī

vo saarī raunaq manzar kī

is sā.at-e-dil-āzār se hai

ik zard udaas sī ḳhāmoshī

is manzar se us manzar tak

ik manzar thā ab vo bhī nahīñ

ik kaTne vaalī gardan thī

ik ḳhanjar thā ab vo bhī nahīñ

ab vo bhī nahīñ jo dekhte hoñ

ye jiit huī yā haar huī

ab vo bhī nahīñ jo kahte hoñ

ye ziist hameñ āzār huī

ab vo bhī nahīñ jo likhte hoñ

ahvāl jise tārīḳh kaheñ

ab ye bhī nahīñ ki ye lāshe

miTTī meñ mileñ gulzār baneñ

ab insāñ khet na haivāñ haiñ

ghar madrase daftar aur na mileñ

añgusht kī ik jumbish se kahīñ

missile dāġhā jā bhī chukā

ik jauharī raqs ke thamne tak

jo daur-e-hayāt thā jā bhī chukā

is ziist ke bandī-ḳhāne se

ham misl-e-ajal āzād hue

ye kaise mulk basā.e the

ik lamhe meñ barbād hue

hai āḳhirī manzar tārājī

huuñ jis kā ek havāla maiñ

ye manzar kaisā manzar hai

jise tanhā dekhne vaalā maiñ

ab us saf meñ bhī koī nahīñ

ab is saf meñ bhī koī nahīñ

maiñ tanhā baiThā sochtā huuñ

kuchh jiine kā imkān to ho

aa baiThe paas jo dushman ke

dushman hī sahī insān to ho

is saf mein bhi sab dushman hain

us saf mein bhi sab dushman hain

jo aankhon mein aankhen Dale

aur dil mein nafrat ko pale

barud ke Dher pe baiThe hain

bas ek saat ki duri par

us insan ki majburi par

koi rone wala bhi to nahin

koi hansne wala bhi to nahin

us saat-e-KHun-asham se thi

wo sari raunaq manzar ki

is saat-e-dil-azar se hai

ek zard udas si KHamoshi

is manzar se us manzar tak

ek manzar tha ab wo bhi nahin

ek kaTne wali gardan thi

ek KHanjar tha ab wo bhi nahin

ab wo bhi nahin jo dekhte hon

ye jit hui ya haar hui

ab wo bhi nahin jo kahte hon

ye zist hamein aazar hui

ab wo bhi nahin jo likhte hon

ahwal jise tariKH kahen

ab ye bhi nahin ki ye lashe

miTTi mein milen gulzar banen

ab insan khet na haiwan hain

ghar madrase daftar aur na milen

angusht ki ek jumbish se kahin

missile dagha ja bhi chuka

ek jauhari raqs ke thamne tak

jo daur-e-hayat tha ja bhi chuka

is zist ke bandi-KHane se

hum misl-e-ajal aazad hue

ye kaise mulk basae the

ek lamhe mein barbaad hue

hai aaKHiri manzar taraji

hun jis ka ek hawala main

ye manzar kaisa manzar hai

jise tanha dekhne wala main

ab us saf mein bhi koi nahin

ab is saf mein bhi koi nahin

main tanha baiTha sochta hun

kuchh jine ka imkan to ho

aa baiThe pas jo dushman ke

dushman hi sahi insan to ho