tanhai ka safarnama

shaam hote hī ghar mujh se chhoTā paḌ jaatā hai

maiñ rastoñ kī bad-duā par niklā huuñ

jahāñ āñkhoñ ko chehre kamāne se fursat nahīñ

lagtā hai tanhā.ī mujh se uub ga.ī hai

sāñseñ mailī ho rahī thiiñ

miTTī ne mujhe phuul banā diyā

ḳhushbū havā kī dost ho jaa.e

to be-rañge log rañg rañg kī bāteñ

karte hī haiñ

(vo ḳhvāh kitne bhī chhoTe ho jaa.eñ

achchhā mausam in par kabhī puurā nahīñ ātā)

bad-zabānoñ ko mālūm nahīñ

uryānī sirf āñkhoñ par jachtī hai

maiñ zamīn par girā huā chāñd huuñ

qadmoñ se pahle dīvār mujhe phalāñg rahī hai

muñDer par dharā charāġh mujh se ziyādā raushan hai!

maiñ bhī to maiñ huuñ

ek gunāh ke evaz apnā saarī nekiyāñ

ḳharch kar baiThtā huuñ

ḳhāmoshī ke ḳhālī badan meñ

koī dhun mujhe gungunātī rahtī hai

udāsī aur kahāñ rahe

kaash ḳhudā mujhe dekh rahā ho!

sham hote hi ghar mujh se chhoTa paD jata hai

main raston ki bad-dua par nikla hun

jahan aankhon ko chehre kamane se fursat nahin

lagta hai tanhai mujh se ub gai hai

sansen maili ho rahi thin

miTTi ne mujhe phul bana diya

KHushbu hawa ki dost ho jae

to be-range log rang rang ki baaten

karte hi hain

(wo KHwah kitne bhi chhoTe ho jaen

achchha mausam in par kabhi pura nahin aata)

bad-zabanon ko malum nahin

uryani sirf aankhon par jachti hai

main zamin par gira hua chand hun

qadmon se pahle diwar mujhe phalang rahi hai

munDer par dhara charagh mujh se ziyaada raushan hai!

main bhi to main hun

ek gunah ke ewaz apna sari nekiyan

KHarch kar baiThta hun

KHamoshi ke KHali badan mein

koi dhun mujhe gungunati rahti hai

udasi aur kahan rahe

kash KHuda mujhe dekh raha ho!