tanhai

aaj apne kamre meñ

kis qadar akelā huuñ

shaam kā dhuñdhlakā hai

sochtā huuñ gin Dālūñ

dostoñ ke nāḳhun se

kitne zaḳhm khaa.e haiñ

un kī samt se dil par

kitne tiir aa.e haiñ

chauñk chauñk uThtā huuñ

khāñsiyoñ kī aahaT se

kaash kuchh havā chaltī

khiḌkiyoñ ke paT hilte

tak rahā hai ā.īna

shīshiyoñ kī saf chup hai

tū hī bol tanhā.ī

vaqt har taraf chup hai

khiḌkiyoñ kī ā.ankhoñ se

āsmāñ ko taktā huuñ

aaj apne kamre meñ

kis qadar akelā huuñ

ghar ke sāmne ab bhī

ek rāsta hogā

koī aa rahā hogā

koī jā rahā hogā

chheḌtī hī rahtī haiñ

is ḳhayāl-e-qurbat ko

sad-hazār āvāzeñ

aatī haiñ ayādat ko

muñh se ḳhuun aatā hai

kitnī duur manzil hai

diq ki sar-phire nāqid

kaun merā qātil hai

lafzoñ kī dukānoñ par

jazba-e-sadāqat kyā

ḳhūn-e-dil diyā maiñ ne

ḳhūn-e-dil kī qīmat kyā

is pe kuchh buzurgoñ kī

mujrimāna ḳhāmoshī

lā.eq-e-nazāra hai

rif.atoñ kī pastī bhī

rahbaroñ se shikva hai

shauq se ḳhafā hote

haañ magar taġhāful meñ

jur.at-āzmā hote

aaj apne kamre meñ

kis qadar akelā huuñ

sirf dil dhaḌaktā hai

haañ maiñ phir bhī zinda huuñ

kyūñki zindagī merī

ahd kī alāmat hai

inqalāb-e-fardā kī

ik baḌī amānat hai

mere fan kī qindīleñ

haiñ diloñ kī rāhoñ par

bijliyāñ girātī haiñ

yaas kī ghaTāoñ par

hoñToñ par tabassum ke

kuchh diye jalātī haiñ

rañg o nuur o naġhma ke

kuchh payām laatī haiñ

lafzoñ ke kaToroñ meñ

rūh-e-asr bhartī haiñ

aaj ke savāloñ kā

hal talāsh kartī haiñ

jab talak mahaktā hai

gul-kada mire fan kā

ai yaqīn-e-fasl-e-gul

fikr-e-jeb-o-dāman kyā

aaj apne kamre mein

kis qadar akela hun

sham ka dhundhlaka hai

sochta hun gin Dalun

doston ke naKHun se

kitne zaKHm khae hain

un ki samt se dil par

kitne tir aae hain

chaunk chaunk uThta hun

khansiyon ki aahaT se

kash kuchh hawa chalti

khiDkiyon ke paT hilte

tak raha hai aaina

shishiyon ki saf chup hai

tu hi bol tanhai

waqt har taraf chup hai

khiDkiyon ki aaankhon se

aasman ko takta hun

aaj apne kamre mein

kis qadar akela hun

ghar ke samne ab bhi

ek rasta hoga

koi aa raha hoga

koi ja raha hoga

chheDti hi rahti hain

is KHayal-e-qurbat ko

sad-hazar aawazen

aati hain ayaadat ko

munh se KHun aata hai

kitni dur manzil hai

diq ki sar-phire naqid

kaun mera qatil hai

lafzon ki dukanon par

jazba-e-sadaqat kya

KHun-e-dil diya main ne

KHun-e-dil ki qimat kya

is pe kuchh buzurgon ki

mujrimana KHamoshi

laeq-e-nazara hai

rifaton ki pasti bhi

rahbaron se shikwa hai

shauq se KHafa hote

han magar taghaful mein

jurat-azma hote

aaj apne kamre mein

kis qadar akela hun

sirf dil dhaDakta hai

han main phir bhi zinda hun

kyunki zindagi meri

ahd ki alamat hai

inqalab-e-farda ki

ek baDi amanat hai

mere fan ki qindilen

hain dilon ki rahon par

bijliyan giraati hain

yas ki ghaTaon par

honTon par tabassum ke

kuchh diye jalati hain

rang o nur o naghma ke

kuchh payam lati hain

lafzon ke kaToron mein

ruh-e-asr bharti hain

aaj ke sawalon ka

hal talash karti hain

jab talak mahakta hai

gul-kada mere fan ka

ai yaqin-e-fasl-e-gul

fikr-e-jeb-o-daman kya