tanhai tumhein yaad karti hai

adab se jhuk ke 'aqīdat bharī nigāhoñ se

falak ne tum ko sar-e-shāḳh-sār dekhā hai

mah-e-tamām ne 'aks-e-ruḳh-e-tajallī meñ

qadam qadam pe tumheñ jalva-bār dekhā hai

ḳhud apne saa.e se Dar kar badan churā.e hue

tumheñ sitāroñ ne dīvāna-vār dekhā hai

shafaq ne tum ko akele meñ kasmasā.e hue

hazār baar nahīñ laakh baar dekhā hai

ḳhud apne husn kī tanvīr meñ nahā.e hue

sahar ne tum ko sarāpā bahār dekhā hai

tumheñ chaman meñ Tahalte hue adāoñ se

guloñ ne dekhā hai aur bār-bār dekhā hai

nasīm-e-sub.h kī aThkheliyoñ ne roz-o-shab

sharāratoñ se tumheñ ham-kanār dekhā hai

magar qarīb se us roz tum ko 'bismil' ne

bas ek baar faqat ek baar dekhā hai

samajh lo phir mujhe tum iltifāt ke qābil

banā do merī ḳhushī ko hayāt ke qābil

tumhāre ras bhare hoñToñ kī muskurāhaT ko

shab-e-darāz kī tanhā.ī yaad kartī hai

hayā ke saa.e meñ guftār kī halāvat ko

javāñ umangoñ kī rā'nā.ī yaad kartī hai

nigāh-e-nāz se aa.ī thī jis meñ rangīnī

tumheñ vo anjuman-ārā.ī yaad kartī hai

nazar kī god meñ phir ek baar aa jaao

dil-e-girafta kī añgḌā.ī yaad kartī hai

tumheñ sañvarte hue aa.ine meñ hañste hue

mire ḳhayāl kī gahrā.ī yaad kartī hai

maiñ jāntā huuñ javānī kī laġhzisheñ kyā haiñ

shab-e-visāl kī dilkash guzārisheñ kyā haiñ

adab se jhuk ke 'aqidat bhari nigahon se

falak ne tum ko sar-e-shaKH-sar dekha hai

mah-e-tamam ne 'aks-e-ruKH-e-tajalli mein

qadam qadam pe tumhein jalwa-bar dekha hai

KHud apne sae se Dar kar badan churae hue

tumhein sitaron ne diwana-war dekha hai

shafaq ne tum ko akele mein kasmasae hue

hazar bar nahin lakh bar dekha hai

KHud apne husn ki tanwir mein nahae hue

sahar ne tum ko sarapa bahaar dekha hai

tumhein chaman mein Tahalte hue adaon se

gulon ne dekha hai aur bar-bar dekha hai

nasim-e-subh ki aThkheliyon ne roz-o-shab

shararaton se tumhein ham-kanar dekha hai

magar qarib se us roz tum ko 'bismil' ne

bas ek bar faqat ek bar dekha hai

samajh lo phir mujhe tum iltifat ke qabil

bana do meri KHushi ko hayat ke qabil

tumhaare ras bhare honTon ki muskurahaT ko

shab-e-daraaz ki tanhai yaad karti hai

haya ke sae mein guftar ki halawat ko

jawan umangon ki ra'nai yaad karti hai

nigah-e-naz se aai thi jis mein rangini

tumhein wo anjuman-arai yaad karti hai

nazar ki god mein phir ek bar aa jao

dil-e-girafta ki angDai yaad karti hai

tumhein sanwarte hue aaine mein hanste hue

mere KHayal ki gahrai yaad karti hai

main jaanta hun jawani ki laghzishen kya hain

shab-e-visal ki dilkash guzarishen kya hain