taqaza

phir raat kī tārīk adā.eñ haiñ musallat

phir sub.h ke hāthoñ se hinā chhūT rahī hai

jo haar tere vāste gūñdhā thā kisī ne

us haar kī ik ek laḌī TuuT rahī hai

jo saaz kabhī vāqif-e-asrār-e-junūñ thā

us saaz kī rag rag se lahū phuuT rahā hai

kyā hosh tujhe sāqī-e-mai-ḳhāna-e-duniyā

vo kaun sā sāġhar hai jo ab TuuT rahā hai

taqdīr ko rote haiñ siyah-baḳht sitāre

āfāq pe zulmāt ne pheñkī haiñ kamandeñ

khultā hī nahīñ ab dar-e-jānāñ ye sunā hai

dīvāne kahāñ jaa.eñ kahāñ raat guzāreñ

ḳhūñrez haqā.eq kī ghanī chhāñv meñ ab tak

doshīza-e-afkār kī zulfeñ haiñ pareshāñ

ab tak haiñ vahī maqtal-o-zanjīr-o-salāsil

ab tak kaf-e-qātil meñ vahī maut ke sāmāñ

ab tak na bujhe dast-e-taġhayyur kī adā se

tasvīr-e-gulistāñ ko jhulaste hue sho.ale

ab tak na haTe apne siyahkār sitam se

tafrīq ke farzand havasnāk luTere

is ālam-e-zulmāt kī pur-haul fazā meñ

ham apnī mohabbat kā lahū bech rahe haiñ

ham jin ko banāte rahe gulshan kā nigahbāñ

ab tak vo rag-e-gul se lahū khīñch rahe haiñ

phir ālam-e-zulmāt meñ rotī hai zuleḳhā

kyā jāniye kis bhes meñ ḳhurshīd-e-sahar hai

phir apne muqaddar pe vahī raat ke pahre

phir jānib-e-maqtal vahī qātil kī nazar hai

phir ham se taqāzā hai tirī shoḳh-nazar kā

tārīkī-e-hālāt kī buniyād hilā deñ

jin se na kabhī sub.h kī kirnoñ kā guzar ho

un tīr-o-tārīk gharoñdoñ ko girā deñ

phir raat ki tarik adaen hain musallat

phir subh ke hathon se hina chhuT rahi hai

jo haar tere waste gundha tha kisi ne

us haar ki ek ek laDi TuT rahi hai

jo saz kabhi waqif-e-asrar-e-junun tha

us saz ki rag rag se lahu phuT raha hai

kya hosh tujhe saqi-e-mai-KHana-e-duniya

wo kaun sa saghar hai jo ab TuT raha hai

taqdir ko rote hain siyah-baKHt sitare

aafaq pe zulmat ne phenki hain kamanden

khulta hi nahin ab dar-e-jaanan ye suna hai

diwane kahan jaen kahan raat guzaren

KHunrez haqaeq ki ghani chhanw mein ab tak

doshiza-e-afkar ki zulfen hain pareshan

ab tak hain wahi maqtal-o-zanjir-o-salasil

ab tak kaf-e-qatil mein wahi maut ke saman

ab tak na bujhe dast-e-taghayyur ki ada se

taswir-e-gulistan ko jhulaste hue shoale

ab tak na haTe apne siyahkar sitam se

tafriq ke farzand hawasnak luTere

is aalam-e-zulmat ki pur-haul faza mein

hum apni mohabbat ka lahu bech rahe hain

hum jin ko banate rahe gulshan ka nigahban

ab tak wo rag-e-gul se lahu khinch rahe hain

phir aalam-e-zulmat mein roti hai zuleKHa

kya jaaniye kis bhes mein KHurshid-e-sahar hai

phir apne muqaddar pe wahi raat ke pahre

phir jaanib-e-maqtal wahi qatil ki nazar hai

phir hum se taqaza hai teri shoKH-nazar ka

tariki-e-haalat ki buniyaad hila den

jin se na kabhi subh ki kirnon ka guzar ho

un tir-o-tarik gharondon ko gira den