taqdir

yahāñ har ek kī qismat meñ likkhā hai

musalsal dā.eroñ meñ ghūmte rahnā

safar saare safar yuuñ hī kaTe haiñ

hamārī zindagī bhī ek hī markaz ke chakkar kāTte guzrī

vo markaz

sirf thoḌī sī mohabbat aur izzat

aur ik nān-e-javīñ kī aarzū hai

kabhī jo mil na paa.e ek aise ham-safar kī justujū hai

maiñ barsoñ se kisī āñdhī ke jhakkaḌ kī tarah

is dā.ere ke raqs-e-paiham se

bahut ghabrā ga.ī huuñ

ki maiñ chakrā ga.ī huuñ

magar ye to azal kā silsila hai

yahāñ sab ke liye ik dā.era hai

bashar huuñ yā ki vo sayyārgāñ hoñ

har ik zarre ke andar nāchte nādīda zarre hoñ

kisī ko bhī mafar koī nahīñ hai

yahāñ har ek kī qismat meñ likkhā hai

musalsal dā.eroñ meñ ghūmte rahnā

yahan har ek ki qismat mein likkha hai

musalsal daeron mein ghumte rahna

safar sare safar yun hi kaTe hain

hamari zindagi bhi ek hi markaz ke chakkar kaTte guzri

wo markaz

sirf thoDi si mohabbat aur izzat

aur ek nan-e-jawin ki aarzu hai

kabhi jo mil na pae ek aise ham-safar ki justuju hai

main barson se kisi aandhi ke jhakkaD ki tarah

is daere ke raqs-e-paiham se

bahut ghabra gai hun

ki main chakra gai hun

magar ye to azal ka silsila hai

yahan sab ke liye ek daera hai

bashar hun ya ki wo sayyargan hon

har ek zarre ke andar nachte nadida zarre hon

kisi ko bhi mafar koi nahin hai

yahan har ek ki qismat mein likkha hai

musalsal daeron mein ghumte rahna