tarkib-e-sarfi

nok-e-mīnār pe aTkī huī qumrī se bhalā

kyā pata ḳhaak chalā

''āsmāñ hadd-e-nazar hai ki kamīñ-gāh-e-raqīb?''

meñ batātā huuñ magar apne suḳhan biich meñ hai

āsmāñ ek kabūtar hai ki jis ke ḳhuuñ kī

pyaas meñ saikḌoñ uqaab uḌā karte haiñ

maut badkār sharābī hai paḌosī merā

roz darvāze ke us paar jo gir jaatā hai

zindagī ek chhachhūñdar hai ki jis kī bad-bū

bū-e-yusuf meñ bhī hai girya-e-ya.aqūb meñ bhī

ilm circus ke madārī ke dahan kā sho.ala

zā.iqa muñh kā badalne ko bahut kaafī hai

aur meñ ek hasīñ ḳhvāb ki jis meñ gum hai

ḳhvāb dekhne vaalā vo kamīñ-gah kā raqīb

nok-e-minar pe aTki hui qumri se bhala

kya pata KHak chala

aasman hadd-e-nazar hai ki kamin-gah-e-raqib?

mein batata hun magar apne suKHan bich mein hai

aasman ek kabutar hai ki jis ke KHun ki

pyas mein saikDon uqab uDa karte hain

maut badkar sharabi hai paDosi mera

roz darwaze ke us par jo gir jata hai

zindagi ek chhachhundar hai ki jis ki bad-bu

bu-e-yusuf mein bhi hai girya-e-yaqub mein bhi

ilm circus ke madari ke dahan ka shoala

zaiqa munh ka badalne ko bahut kafi hai

aur mein ek hasin KHwab ki jis mein gum hai

KHwab dekhne wala wo kamin-gah ka raqib