tarsil

kuchh log ye kahte haiñ ki achchhā yā burā kuchh bhī nahīñ hai

taqrīb-e-vilādat ho yā hañgām-e-dam-e-marg

ik lamhe ko tasvīr meñ Dhalnā hai vo Dhal jaatā hai āḳhir

vo naġhma ho yā girya yā andāz-e-takallum

sab aks haiñ asrār-e-fusūñ-kār ke shāyad

yaksāñ haiñ mukāfāt kī yūrish meñ sabhī rañg

sargoshiyāñ karte haiñ guzar jaate haiñ āñkhoñ ke jahāñ se

paimāna-e-jāñ se

kyā jhuuT hai kyā sach hai kise kaun batā.e

sab shor-e-salāsil meñ utar aa.e haiñ kuchh soch rahe haiñ

tasvīr ke do ruḳh the kabhī sunte haiñ ab laakh hue haiñ

insān yā haivān yā be-jān koī naam nahīñ hai

ik raqs-e-tamavvuj hai shabīhoñ kā hayyūloñ kā sadāoñ kā farāmosh diloñ kā

is raah se guzre the tumheñ rok liyā apnā samajh kar

bāteñ bhī huiiñ tum ko zarā der ko siine se lagāyā

āñkhoñ meñ dil o jaañ meñ basāyā

jāoge tumheñ jaanā hai ma.alūm thā mujh ko

sach ye hai ki tanvīr-e-mulāqāt se raushan thā ye lamha

sach ye hai ki sar-e-rāh charāġh us ne jalāyā

sach ye hai ki be-sāḳhta jazbāt se raushan thā ye lamha

imroz ye merā thaa, magar merī duā hai

ye lamha ham donoñ ke imkān kā mehvar

kal bhī ye kare donoñ ko ham donoñ ko sarshār munavvar

kuchh log ye kahte hain ki achchha ya bura kuchh bhi nahin hai

taqrib-e-wiladat ho ya hangam-e-dam-e-marg

ek lamhe ko taswir mein Dhalna hai wo Dhal jata hai aaKHir

wo naghma ho ya girya ya andaz-e-takallum

sab aks hain asrar-e-fusun-kar ke shayad

yaksan hain mukafat ki yurish mein sabhi rang

sargoshiyan karte hain guzar jate hain aankhon ke jahan se

paimana-e-jaan se

kya jhuT hai kya sach hai kise kaun batae

sab shor-e-salasil mein utar aae hain kuchh soch rahe hain

taswir ke do ruKH the kabhi sunte hain ab lakh hue hain

insan ya haiwan ya be-jaan koi nam nahin hai

ek raqs-e-tamawwuj hai shabihon ka hayyulon ka sadaon ka faramosh dilon ka

is rah se guzre the tumhein rok liya apna samajh kar

baaten bhi huin tum ko zara der ko sine se lagaya

aankhon mein dil o jaan mein basaya

jaoge tumhein jaana hai malum tha mujh ko

sach ye hai ki tanwir-e-mulaqat se raushan tha ye lamha

sach ye hai ki sar-e-rah charagh us ne jalaya

sach ye hai ki be-saKHta jazbaat se raushan tha ye lamha

imroz ye mera tha, magar meri dua hai

ye lamha hum donon ke imkan ka mehwar

kal bhi ye kare donon ko hum donon ko sarshaar munawwar