tarz-e-hayat

terī nazar meñ vus.at-e-kaun-o-makāñ rahe

baalā ta.a.īnāt se terā jahāñ rahe

shabnam sā saaf ho tirī fitrat kā ā.īna

kirnoñ se āftāb kī tū ham-zabāñ rahe

har bol terā naġhma-e-rañgīñ se ho sivā

terī tamām zindagī ik dāstāñ rahe

lahrā rahā hai dil meñ tire chashma-e-hayāt

tujh par hazār haif ki tishna-dahāñ rahe

jab ashk-hā-e-ḳhūñ ko guhar tū banā sake

phir kyoñ tirī nigāh sū-e-asmāñ rahe

fursat tirī aziiz hai manzil kī raah le

kab tak shikāyat-e-sitam-e-āsmāñ rahe

rasm-o-quyūd kā kabhī pāband tū na rah

parvāna kar jo tujh se jahāñ sargirāñ rahe

himmat ye hai ki terī judā kā.enāt ho

kyoñ tujh ko nāzish-e-hasham-e-raftagāñ rahe

ho umr muḳhtasar tirī par sham.a kī tarah

jab tak rahe tū raunaq-e-bazm-e-jahāñ rahe

teri nazar mein wusat-e-kaun-o-makan rahe

baala tainat se tera jahan rahe

shabnam sa saf ho teri fitrat ka aaina

kirnon se aaftab ki tu ham-zaban rahe

har bol tera naghma-e-rangin se ho siwa

teri tamam zindagi ek dastan rahe

lahra raha hai dil mein tere chashma-e-hayat

tujh par hazar haif ki tishna-dahan rahe

jab ashk-ha-e-KHun ko guhar tu bana sake

phir kyon teri nigah su-e-asman rahe

fursat teri aziz hai manzil ki rah le

kab tak shikayat-e-sitam-e-asman rahe

rasm-o-quyud ka kabhi paband tu na rah

parwana kar jo tujh se jahan sargiran rahe

himmat ye hai ki teri juda kaenat ho

kyon tujh ko nazish-e-hasham-e-raftagan rahe

ho umr muKHtasar teri par shama ki tarah

jab tak rahe tu raunaq-e-bazm-e-jahan rahe