tasbih aur zunnar

zunnār se tasbīh kī phir kaise nibhegī

ye is se pareshān hai vo us se pareshāñ

kuchh abr-e-sitam aisā musallat hai fazā par

insān ko insān samajhtā nahīñ insāñ

masjid se barahman ko hai aabid ko butoñ se

nafrat ke diyoñ se hai har ik ghar meñ charāġhāñ

maġhrib kī siyāsat ne to duniyā hī badal dī

zunnār chamakdār na tasbīh daraḳhshāñ

īmān ke mehvar se 'razī' donoñ judā haiñ

giitā vahāñ baksoñ meñ yahāñ taaq meñ qur.āñ

zunnar se tasbih ki phir kaise nibhegi

ye is se pareshan hai wo us se pareshan

kuchh abr-e-sitam aisa musallat hai faza par

insan ko insan samajhta nahin insan

masjid se barahman ko hai aabid ko buton se

nafrat ke diyon se hai har ek ghar mein charaghan

maghrib ki siyasat ne to duniya hi badal di

zunnar chamakdar na tasbih daraKHshan

iman ke mehwar se 'razi' donon juda hain

gita wahan bakson mein yahan taq mein quran