tashbib

tujh ko chāñd nahīñ kah saktā

kyūñki ye chāñd to is dhartī ke chaar taraf nāchā kartā hai

maiñ albatta dīvāna huuñ

tere gird phirā kartā huuñ

jaise zamīñ ke gird ye chāñd aur sūraj ke gird apnī zamīñ nāchā kartī hai

lekin maiñ bhī chāñd nahīñ huuñ

maiñ bādal kā ik TukḌā huuñ

jis ko terī qurbat kī kirnoñ ne uThā kar zulfoñ jaisī narm havā ko sauñp diyā hai

lekin bādal kī qismat kyā

tere firāq kī garmī mujh ko pighlā kar phir aañsū ke ik qatre meñ tabdīl karegī

tujh ko charāġh nahīñ kah saktā

kyūñki charāġh to shām-e-ġharībāñ ke sahrā meñ sub.h-e-vatan kā naqsh-e-qadam hai

mujh meñ itnā nuur kahāñ hai

maiñ to ik daryūza-gar huuñ

sūraj chāñd sitāroñ ke darvāzoñ par dastak detā huuñ

ek kiran do

ek dahaktā añgāroñ do

kabhī kabhī mil jaatā hai

aur kabhī ye daryūza-gar ḳhālī haath chalā aatā hai

maiñ to ek daryūza-gar huuñ

kaliyoñ ke darvāzoñ par dastak detā huuñ

ik chuTkī bhar rañg aur use ḳhushbū de

lafzoñ kā kashkol liye phirtā rahtā huuñ

kabhī kabhī kuchh mil jaatā hai

aur kabhī ye daryūza-gar chāk-garebāñ phūloñ ko ḳhud apne garebāñ kā ik TukḌā de aatā hai!

tujh ko ḳhvāb nahīñ kah saktā

ḳhvāboñ kā kyā

ḳhizāñ-rasīda pattī ke mānind havā kī Thes se bhī TuuTā karte haiñ

lekin maiñ bhī ḳhvāb nahīñ huuñ

ḳhvāb to vo hai jis ko koī dekh rahā ho

maiñ ik diid huuñ

ik giitā huuñ

ik injīl huuñ ik qur.āñ huuñ

rāhguzar par paḌā huā huuñ

suud o ziyāñ kī is duniyā meñ kise bhalā itnī fursat hai

mujhe uThā kar jo ye dekhe

mujh meñ āḳhir kyā likkhā hai

tujh ko raaz nahīñ kah saktā

raaz to akasr khul jaate haiñ

lekin maiñ bhī raaz nahīñ huuñ

maiñ ik ġhamgīñ ā.īna huuñ

merī nazmoñ kā har misra is ā.īne kā jauhar hai

ā.īne meñ jhāñk kar log apne ko dekh rahe haiñ

ā.īne ko kis ne dekhā

tū hī batlā tere liye maiñ lā.ūñ kahāñ se ab tashbīheñ

jis tashbīh ko chhūtā huuñ vo jhijhak ke pīchhe haT jaatī hai

kah uThtī hai

maiñ nāqis huuñ

jān-e-tamannā

terā shā.er tere qasīde kī tashbīb kī vaadī hī meñ āvāra hai

tujh ko chand nahin kah sakta

kyunki ye chand to is dharti ke chaar taraf nacha karta hai

main albatta diwana hun

tere gird phira karta hun

jaise zamin ke gird ye chand aur suraj ke gird apni zamin nacha karti hai

lekin main bhi chand nahin hun

main baadal ka ek TukDa hun

jis ko teri qurbat ki kirnon ne uTha kar zulfon jaisi narm hawa ko saunp diya hai

lekin baadal ki qismat kya

tere firaq ki garmi mujh ko pighla kar phir aansu ke ek qatre mein tabdil karegi

tujh ko charagh nahin kah sakta

kyunki charagh to sham-e-ghariban ke sahra mein subh-e-watan ka naqsh-e-qadam hai

mujh mein itna nur kahan hai

main to ek daryuza-gar hun

suraj chand sitaron ke darwazon par dastak deta hun

ek kiran do

ek dahakta angaron do

kabhi kabhi mil jata hai

aur kabhi ye daryuza-gar KHali hath chala aata hai

main to ek daryuza-gar hun

kaliyon ke darwazon par dastak deta hun

ek chuTki bhar rang aur use KHushbu de

lafzon ka kashkol liye phirta rahta hun

kabhi kabhi kuchh mil jata hai

aur kabhi ye daryuza-gar chaak-gareban phulon ko KHud apne gareban ka ek TukDa de aata hai!

tujh ko KHwab nahin kah sakta

KHwabon ka kya

KHizan-rasida patti ke manind hawa ki Thes se bhi TuTa karte hain

lekin main bhi KHwab nahin hun

KHwab to wo hai jis ko koi dekh raha ho

main ek did hun

ek gita hun

ek injil hun ek quran hun

rahguzar par paDa hua hun

sud o ziyan ki is duniya mein kise bhala itni fursat hai

mujhe uTha kar jo ye dekhe

mujh mein aaKHir kya likkha hai

tujh ko raaz nahin kah sakta

raaz to akasr khul jate hain

lekin main bhi raaz nahin hun

main ek ghamgin aaina hun

meri nazmon ka har misra is aaine ka jauhar hai

aaine mein jhank kar log apne ko dekh rahe hain

aaine ko kis ne dekha

tu hi batla tere liye main laun kahan se ab tashbihen

jis tashbih ko chhuta hun wo jhijhak ke pichhe haT jati hai

kah uThti hai

main naqis hun

jaan-e-tamanna

tera shaer tere qaside ki tashbib ki wadi hi mein aawara hai