tasKHir-e-fitrat ke baad

tasḳhīr-e-fitrat ke ba.ad

havā ai havā

maiñ tirā ek añg ek lahrā thā

sadiyoñ tire saath dasht dāman-e-koh-e-sahrā meñ

āzād-o-sarshār phirtā rahā huuñ

samundar kī chhātī pe sadiyoñ tire saath

be-fikr-o-be-dast chaltā rahā huuñ

anokhī zamīnoñ tilismī jazīroñ ko daryāft kartā rahā huuñ

mujhe tū ne fitrat ke ba.ad

sanam-ḳhāna-e-kā.ināt-e-āzarī ke tilismāt kise aa ke bāhar nikālā

mire ḳhauf se kāñpte dil ko

vahmoñ meñ hue sar ko

sajde se tū ne uThā kar

unheñ āgahī-o-amal kī nayā nuur baḳhshā

mujhe ḳhud se aur ḳhud se bāhar mazāhir se

sadiyoñ ham-āhañg honā sikhāyā

samundar ke dukh ko samajhne kī ḳhātir

ubalte hue garm pur-shor tūfāñ ko naapā hai maiñ ne

bayābāñ kī tanhā.ī ko duur karne kī ḳhātir

maiñ taptī huī ret par sadiyoñ paidal chalā huuñ

badalte hue mausamoñ kā har ik raaz lene ko maiñ ne

bahār-o-ḳhizāñ meñ daraḳhtoñ ke sāyoñ meñ Thahrā to bachchoñ kī sāñseñ ginī haiñ

zamāne kā har sard-o-garm āzmāne ko sadiyoñ hī tak maiñ

pahāḌoñ kī barfīlī choTī se

aur koh-e-ātish-fashāñ ke dahāne se guzar kiyā huuñ

aur us par abhī jab nā-tamāmī kā ehsās Dastā rahā

apnī takmīl karne kī ḳhātir

bulandī kī pur-nūr chaukhaT ko

pastī ke tārīk ġhāroñ ko chūmā hai maiñ ne

ġharaz zindagī ke har ek dard se ḳhud ko añgez kar ke

havā ai havā

maiñ ki tujh se bichhaḌne se pahle

tirī tarah āzād-o-sarshār thā

ab ye kis tarah kī munhamik TūTtī zindagī hai

ki tū shahr shahr aadmī kī tag-o-tāz kī taab laane ke qābil nahīñ

aur maiñ shahr shahr ek patthar sā rastoñ meñ behis paḌā huuñ

tirī sust-paimā.ī aur apnī bechārgī kā gila kar rahā huuñ

tasKHir-e-fitrat ke baad

hawa ai hawa

main tera ek ang ek lahra tha

sadiyon tere sath dasht daman-e-koh-e-sahra mein

aazad-o-sarshaar phirta raha hun

samundar ki chhati pe sadiyon tere sath

be-fikr-o-be-dast chalta raha hun

anokhi zaminon tilismi jaziron ko daryaft karta raha hun

mujhe tu ne fitrat ke baad

sanam-KHana-e-kainat-e-azari ke tilismat kise aa ke bahar nikala

mere KHauf se kanpte dil ko

wahmon mein hue sar ko

sajde se tu ne uTha kar

unhen aagahi-o-amal ki naya nur baKHsha

mujhe KHud se aur KHud se bahar mazahir se

sadiyon ham-ahang hona sikhaya

samundar ke dukh ko samajhne ki KHatir

ubalte hue garm pur-shor tufan ko napa hai main ne

bayaban ki tanhai ko dur karne ki KHatir

main tapti hui ret par sadiyon paidal chala hun

badalte hue mausamon ka har ek raaz lene ko main ne

bahaar-o-KHizan mein daraKHton ke sayon mein Thahra to bachchon ki sansen gini hain

zamane ka har sard-o-garm aazmane ko sadiyon hi tak main

pahaDon ki barfili choTi se

aur koh-e-atish-fashan ke dahane se guzar kiya hun

aur us par abhi jab na-tamami ka ehsas Dasta raha

apni takmil karne ki KHatir

bulandi ki pur-nur chaukhaT ko

pasti ke tarik ghaaron ko chuma hai main ne

gharaz zindagi ke har ek dard se KHud ko angez kar ke

hawa ai hawa

main ki tujh se bichhaDne se pahle

teri tarah aazad-o-sarshaar tha

ab ye kis tarah ki munhamik TuTti zindagi hai

ki tu shahr shahr aadmi ki tag-o-taz ki tab lane ke qabil nahin

aur main shahr shahr ek patthar sa raston mein behis paDa hun

teri sust-paimai aur apni bechaargi ka gila kar raha hun