taslis

zamīñ ghūmtī hai

zamīñ ke badan par

fazā kī ridā hai

fazā kī hadoñ se pare

phir ḳhalā hai

fazā aur ḳhalā meñ

ḳhudā hī ḳhudā hai

jo sab jāntā hai

ki us kī hī likkhī huī avvalīñ lauh par

(ādmī ke) gunāhoñ kā qissa likhā hai

usī ke jalā.e hue dozaḳhoñ meñ

bhaḌaktī huī aag kī

tez niilī zabāñ gā rahī hai

usī ke utāre hue sab sahīfoñ kī

har tīsrī satr batlā rahī hai

ki us ko patā hai

gunāhoñ kī lazzat ko vo jāntā hai

ḳhalā se udhar

ghūmtī is zamīñ par

gunāhoñ kī lazzat ko

umm-e-ḳhatūba kī mīThī zabāñ ne chakhā hai

ki jis ke badan meñ

chhupī jannatoñ kī khulī rāhatoñ kā mazā hai

ki jis ke sadā garm bistar kī

har ek silvaT meñ

kitne hī mardoñ kā īmān

ThanDā paḌā hai

zamin ghumti hai

zamin ke badan par

faza ki rida hai

faza ki hadon se pare

phir KHala hai

faza aur KHala mein

KHuda hi KHuda hai

jo sab jaanta hai

ki us ki hi likkhi hui awwalin lauh par

(admi ke) gunahon ka qissa likha hai

usi ke jalae hue dozaKHon mein

bhaDakti hui aag ki

tez nili zaban ga rahi hai

usi ke utare hue sab sahifon ki

har tisri satr batla rahi hai

ki us ko pata hai

gunahon ki lazzat ko wo jaanta hai

KHala se udhar

ghumti is zamin par

gunahon ki lazzat ko

umm-e-KHatuba ki miThi zaban ne chakha hai

ki jis ke badan mein

chhupi jannaton ki khuli rahaton ka maza hai

ki jis ke sada garm bistar ki

har ek silwaT mein

kitne hi mardon ka iman

ThanDa paDa hai