taswiren

yak-rañg meñ saikaḌoñ rañg hote haiñ

halke, gahre, maddham shaffāf

raushniyoñ se bhare, chamakte, jagmagāte

surma.ī abreshmī naqābeñ Daale

ghule mile

dhuup chhāñv kī āñkh-mīcholī khelte

anokhe nuqūsh meñ ubhre uḌte hue

yā phir itne gambhīr

jaise jahāzoñ ke lañgar

in meñ lahreñ hotī haiñ

taḌaptī bechain tūfānī

aur aisī bhī

jin par sukūn ke saa.e

chhā.e hue hote haiñ

lekin un ke nīche

pahāḌī jharnoñ kī tezī, tilmilāhaT

justujū kī lahak

aarzū kī pāgal mahak

chhupī hotī hai

aur jab ka.ī rañg

un kī be-shumār tarañgeñ

tarah tarah kī chhoTī baḌī

chhupī aur zāhir lahreñ

miltī ek dūsre se Takrātī haiñ

tab na.e hairat-nāk hayūle

aadhe puure bal khāte dā.ere

mauhūm lakīreñ

lā-javāb shakleñ

aur aise paikar jo kisī dūsrī chiiz kī tarah nahīñ hote

lekin jo ḳhud apnī alag anuup hastī meñ

na.ī-navelī dulhan

nau-zā.ida bachche kī tarah

achchhe lagte haiñ

vajūd meñ aa jaate haiñ

jhilmilāte dhabboñ kā ye sho.ala

insānī uñgliyoñ zehn aur ruuh kā ye karishma

zabān kā ye jauhrī dhamāka

zindagī ko par lagā detā hai

use itnā ūñchā uḌā le jaatā hai

jahāñ se is dhartī

aur is par basne vāloñ ko

ham yuuñ dekhte haiñ

jaise tītof ne use dekhā thā

aur us kī sab achchhā.iyoñ

ḳhūbsūrtiyoñ

is kī ḳhushbuoñ

latāfatoñ rañgīniyoñ kā partav

hamārī rūhoñ par bhī paḌtā hai

ham badal jaate haiñ

aisā hī ek chhitr

tum ko ma.alūm nahīñ

kin āsmānī rañgoñ se khīñchā

apsarāoñ kī na jaane kaisī jaadū mudrāoñ se bharā

sovarg ke kaun se madhur rāgoñ meñ Dhālā

aur chupke se

man ke garm tapte āñgan meñ rakh diyā

daf.atan hazāroñ bahāreñ jaag paḌīñ

gulābī pañkhuḌiyāñ barasne lagīñ

mahaktī havāoñ se

halkī halkī ThanDī narmiyāñ Tapak paḌīñ

aur zindagī kī ḳhālī maañg

sindōr se bhar ga.ii!

yak-rang mein saikaDon rang hote hain

halke, gahre, maddham shaffaf

raushniyon se bhare, chamakte, jagmagate

surmai abreshmi naqaben Dale

ghule mile

dhup chhanw ki aankh-micholi khelte

anokhe nuqush mein ubhre uDte hue

ya phir itne gambhir

jaise jahazon ke langar

in mein lahren hoti hain

taDapti bechain tufani

aur aisi bhi

jin par sukun ke sae

chhae hue hote hain

lekin un ke niche

pahaDi jharnon ki tezi, tilmilahaT

justuju ki lahak

aarzu ki pagal mahak

chhupi hoti hai

aur jab kai rang

un ki be-shumar tarangen

tarah tarah ki chhoTi baDi

chhupi aur zahir lahren

milti ek dusre se Takraati hain

tab nae hairat-nak hayule

aadhe pure bal khate daere

mauhum lakiren

la-jawab shaklen

aur aise paikar jo kisi dusri chiz ki tarah nahin hote

lekin jo KHud apni alag anup hasti mein

nai-naweli dulhan

nau-zaida bachche ki tarah

achchhe lagte hain

wajud mein aa jate hain

jhilmilate dhabbon ka ye shoala

insani ungliyon zehn aur ruh ka ye karishma

zaban ka ye jauhri dhamaka

zindagi ko par laga deta hai

use itna uncha uDa le jata hai

jahan se is dharti

aur is par basne walon ko

hum yun dekhte hain

jaise titof ne use dekha tha

aur us ki sab achchhaiyon

KHubsurtiyon

is ki KHushbuon

latafaton ranginiyon ka partaw

hamari ruhon par bhi paDta hai

hum badal jate hain

aisa hi ek chhitr

tum ko malum nahin

kin aasmani rangon se khincha

apsaraon ki na jaane kaisi jadu mudraon se bhara

sowarg ke kaun se madhur ragon mein Dhaala

aur chupke se

man ke garm tapte aangan mein rakh diya

dafatan hazaron bahaaren jag paDin

gulabi pankhuDiyan barasne lagin

mahakti hawaon se

halki halki ThanDi narmiyan Tapak paDin

aur zindagi ki KHali mang

sindoor se bhar gai!