taujih

bhalā qat-e-ta.alluq kī koī taujīh kaise ho

ta.alluq TūTne kī nahj par aa kar hamesha TuuT jaatā hai

lab-e-bām-e-tamannā haath aksar chhūT jaatā hai

kabhī kuchh moḌ sīdhe rāstoñ ko moḌ dete haiñ

kabhī lambī masāfat kī thakan shauq-e-safar ko maañd kartī hai

kabhī yaksāniyat kā ḳhauf jazboñ kī lagāmeñ khīñch letā hai

kabhī ik rāh-rau jaldī meñ hotā hai

kabhī ḳhvāhish to hotī hai

magar jazba nahīñ hotā

kabhī jazbāt hote haiñ

magar ḳhvāhish nahīñ hotī

kabhī aisā bhī hotā hai

ta.alluq se ta.affun uThne lagtā hai

kabhī kuchh bhī nahīñ hotā

magar phir bhī ta.alluq TuuT jaatā hai

bhalā qat-e-ta.alluq kī koī taujīh kaise ho

bhala qat-e-talluq ki koi taujih kaise ho

talluq TuTne ki nahj par aa kar hamesha TuT jata hai

lab-e-baam-e-tamanna hath aksar chhuT jata hai

kabhi kuchh moD sidhe raston ko moD dete hain

kabhi lambi masafat ki thakan shauq-e-safar ko mand karti hai

kabhi yaksaniyat ka KHauf jazbon ki lagamen khinch leta hai

kabhi ek rah-rau jaldi mein hota hai

kabhi KHwahish to hoti hai

magar jazba nahin hota

kabhi jazbaat hote hain

magar KHwahish nahin hoti

kabhi aisa bhi hota hai

talluq se taffun uThne lagta hai

kabhi kuchh bhi nahin hota

magar phir bhi talluq TuT jata hai

bhala qat-e-talluq ki koi taujih kaise ho