tawaif

kabhī dil sochtā hai in tavā.if-zādiyoñ kī zindagī likkhūñ

ki jin ke roz-o-shab koThe kī chhoTī koTharī meñ malgajī sī raushnī meñ zindagī kī talḳhiyāñ chun kar guzartī haiñ

ki jin ke phuul se komal badan ne thuuk se luThḌe badan kā fāsla sā tai kiyā ho chand lamhoñ meñ

ki jin ke tan se lākhoñ vahshiyoñ ne rāt-o-din ke har pahar meñ jāñ-fishānī se havas kī fasl kaaTī ho

kabhī dil chāhtā hai in tavā.if-zādiyoñ kī zindagī bartūñ

jo din Dhalte hī rozīna badan par ḳhushnumā chādar chaḌhā kar apne hisse kī muñDeroñ se jhalaktī haiñ

Dhalaktī chhātiyoñ ko ik adā-e-be-niyāzī se havas ke nīlgūñ bāzār meñ nīlām kartī haiñ

pichakte peT sūkhe than kī zarḳhezī kī ḳhātir vo zamīn-e-jism ke rāzoñ ko tasht-az-bām kartī haiñ

kabhī dil kulbulātā hai ki pūchhūñ ā.inoñ ke shahr meñ be-chehragī kaisī

vo vahshī jo pas-e-dīvār apne dast-e-jinsī se dur-e-nāsufta kī pākīzgī ko taar karte haiñ

unheñ din ke ujāle meñ unheñ a.amāl-nāmoñ ke havāloñ se savāloñ meñ pirone se bhalā be-ġhairatī kaisī

vo chīḳheñ jo pas-e-zindān ghuTtī haiñ sisaktī haiñ vo saa.e jo pas dīvār rulte haiñ kuchalte haiñ

mujhe un kī kahānī ko ghinaunī zindagānī ko yuuñ nazmoñ meñ samone se zamāne ko batāne se bhalā be-pardagī kaisī

kabhi dil sochta hai in tawaif-zadiyon ki zindagi likkhun

ki jin ke roz-o-shab koThe ki chhoTi koThari mein malgaji si raushni mein zindagi ki talKHiyan chun kar guzarti hain

ki jin ke phul se komal badan ne thuk se luThDe badan ka fasla sa tai kiya ho chand lamhon mein

ki jin ke tan se lakhon wahshiyon ne raat-o-din ke har pahar mein jaan-fishani se hawas ki fasl kaTi ho

kabhi dil chahta hai in tawaif-zadiyon ki zindagi bartun

jo din Dhalte hi rozina badan par KHushnuma chadar chaDha kar apne hisse ki munDeron se jhalakti hain

Dhalakti chhatiyon ko ek ada-e-be-niyazi se hawas ke nilgun bazar mein nilam karti hain

pichakte peT sukhe than ki zarKHezi ki KHatir wo zamin-e-jism ke raazon ko tasht-az-baam karti hain

kabhi dil kulbulata hai ki puchhun aainon ke shahr mein be-chehragi kaisi

wo wahshi jo pas-e-diwar apne dast-e-jinsi se dur-e-nasufta ki pakizgi ko tar karte hain

unhen din ke ujale mein unhen aamal-namon ke hawalon se sawalon mein pirone se bhala be-ghairati kaisi

wo chiKHen jo pas-e-zindan ghuTti hain sisakti hain wo sae jo pas diwar rulte hain kuchalte hain

mujhe un ki kahani ko ghinauni zindagani ko yun nazmon mein samone se zamane ko batane se bhala be-pardagi kaisi