tazad

maiñ sochtā huuñ

maiñ ek insān huuñ ek musht-e-ġhubār huuñ maiñ

abhī maiñ ye soch hī rahā thā

ki ek āvāz sarsarā.ī fazā kī ḳhāmosh vus.atoñ meñ

palaT ke dekhā

koī havā.ī jahāz parvāz kar rahā thā

jo lamha lamha bulandiyoñ kī taraf ravāñ thā

maiñ us ko taktā rahā musalsal

na jaane kab tak

na jaane is lamha-e-gurezāñ ke tañg dāman meñ kitnī sadiyāñ simaT ga.ī thiiñ

na jaane merī nazar meñ kitne na.e ufuq jagmagā.e

kitne hī chāñd sūraj ubhar ke Duube

na jaane vo kaun sā jahāñ thā

zamīñ ki paañv tale koī farsh-e-zar ho jaise

falak ki sar par ridā-e-āb-e-guhar ho jaise

fazā munavvar

havā mo.attar

nafas nafas meñ basī huī nik.hat-e-gul-e-tar

ḳhalāoñ meñ mushtarī o zohra kā raqs jaarī

tamām aalam pe halkā halkā surūr taarī

na jaane maiñ kis ḳhayāl meñ gum

kis abr-pāre pe uḌ rahā thā

ġhurūr se sar buland kar ke har ik sitāre ko dekhtā thā

ki ek dil-doz chīḳh gūñjī fazā kī ḳhāmosh vus.atoñ meñ

maiñ chauñk uTThā

palaT ke dekhā

galī se ik haDDiyoñ kā Dhāñcha guzar rahā thā

jo chīḳh kar ek ik se kahtā thā ''ek roTī

ḳhudā tumhārā bhalā karegā''

main sochta hun

main ek insan hun ek musht-e-ghubar hun main

abhi main ye soch hi raha tha

ki ek aawaz sarsarai faza ki KHamosh wusaton mein

palaT ke dekha

koi hawai jahaz parwaz kar raha tha

jo lamha lamha bulandiyon ki taraf rawan tha

main us ko takta raha musalsal

na jaane kab tak

na jaane is lamha-e-gurezan ke tang daman mein kitni sadiyan simaT gai thin

na jaane meri nazar mein kitne nae ufuq jagmagae

kitne hi chand suraj ubhar ke Dube

na jaane wo kaun sa jahan tha

zamin ki panw tale koi farsh-e-zar ho jaise

falak ki sar par rida-e-ab-e-guhar ho jaise

faza munawwar

hawa moattar

nafas nafas mein basi hui nikhat-e-gul-e-tar

KHalaon mein mushtari o zohra ka raqs jari

tamam aalam pe halka halka surur tari

na jaane main kis KHayal mein gum

kis abr-pare pe uD raha tha

ghurur se sar buland kar ke har ek sitare ko dekhta tha

ki ek dil-doz chiKH gunji faza ki KHamosh wusaton mein

main chaunk uTTha

palaT ke dekha

gali se ek haDDiyon ka Dhancha guzar raha tha

jo chiKH kar ek ek se kahta tha ek roTi

KHuda tumhaara bhala karega